Tasiilami nuna sajuttoq: Illorput tamarmi sajuppoq

Tunumi nuna Richterip uuttuutaani 4,5-inik sakkortutigisumik uuttorneqartumik unnuaq sajummat innuttaasut tupassimaqaat.

Nunap sajunnera Tasiilamiit avannamut 23 kilometerinik nunallu iluani 10 kilometerisut ititigisumiit aallaveqarpoq.     

Marianne Heimer Mikaelsen Tasiilap ungasinngisaani Kulusummi najugaqarpoq. Taanna unnuap-qeqqanngitsiartoq innaqqammerluni nuna sajulersoq malugaa.

Nunallu sajunnerata siniffik sajulersimmagu Marianne Heimer Mikaelsen iteriasaarpoq.

- Ippassaq unnussiuaareerluta unnuap qeqqata missaani innakaavugut, sinngutilereerluta iteriartorpunga nipimik eqqumiitsumik tusaasaqarlunga. Nuna sajuppillattutut nipiliorluni nippakkiartuinnarpoq. Nippakkiartuinnarneralu ilutigalugu illorput sajulerpoq, siniffippullu tamarsuarmi sajulerpoq. Sajungaarmat uiga eqqanni aperaara susoqarnersoq, akivoq isumaqarnerarluni uanga saniani pikillunga siniffik aalatikkiga. Taava oqarfigaara nuna sajuttoq, taanna KNR-imut nassuiaavoq.

- Inimut anillakkama nukarliliarput, iseqqammisoq aperaara nuna sajuttoq malugisimaneraa. Angerpoq sakkortungaarmanngooq orluvoq.

Nunap sajunnera nipitusimasoq ujarassuillu assakaasut nipaannut assersuunneqarsinnaasoq Marianne Heimer Mikaelsen oqarpoq.

Taannali nunap sajunnerata nalaani eqqissisimavoq, ataatsimilli eqqarsaateqarluni:

- Annilaanganngilagut, kisianni uanga ernumaleraluarpunga aappassaanik takkunnialeqinammat, taamaattumik sivittajaamik sininngilanga sillimallunga.

Nuna sajuffiusartoq

Nunarput nunami sajuffiusartumiippoq. Tamannalu pissutigalugu Tasiilami Qeqertarsuullu tunuani nuna sajukulavoq.

Nunatsinni nunap ataani qupparpassuaqarnera pissutaavoq. Taakku quppaapput itisoorujussuit ilaatigut nikittartut.