Tasiilami nuna marloriarluni sajuppoq
Nunap sajunnera siulleq, Tasiilap politeeqarfiata ittuata, Mathæus Larsenip angerlarsimaffimminiitilluni malugaa.
- Ippassaq unnukkut quligiluat qaangerlugu tanneq marlunngortorlu tassanngaannaq nippappoq ittuttutut nipeqarluni, soorlu illortput qupisutut nuipeqarluni. Tassani paasivara nuna annikitsumik sajuttoq.
Mathæus Larsenip aamma oqaluttuaraa, Tasiilami nunap sajuttarneri amerlammata tamanna sungiutiinnalersimallugu.
- Tasiilami nuna ukiut tamarluinnaasa annikitsumik akuttunngitsumillu sajuttarpoq, qujanartumik inunnik ajoqusetoqassanani. Nunap sajuttarneri maanni naliginnaasupilussuupput.
Tasiilap politeeqarfiata ittuata, Mathæus Larsen taama oqaluttuarpoq.
Tasiilap kangiani nunap ippassaq unnukkut sajunneri, Danmarkip Kalaallit Nunaatalu ujarassiuutut misissuisarfianit, GEUS-imit uppernarsarneqarput. Tamanna pillugu nunap sajuttarneranik ilisimatooq, Peter Voss ima oqarpoq.
- Nunap sajunnera siulleq pivoq unnukkut nalunaaqutaq qulingiluat qaangerlugu tanneq marlunngortorlu taanna richterup uuttuutaa malillugu 2,9-mik sakkortussuseqarluni. Oqartoqarsinnaanngilaq sakkortuujusoq, kisianni tamanna Tasiilami innuttaasunit arlalinnit malugineqarsimammat nalunaarutinik arlalinnik pissarsiaqarpugut, tassami nunap sajuffiata qiterpiaa Tasiilamiit kilometerit qulit missaannik taamaallaa ungasitsigisumiimmat.
Peter Vossip aamma oqaluttuaraa, nunap sajunnerata aappaa unnukkut nalunaaqutaq aqqaneq qaangerlugu tanneq marlunngulersorlu pisimasoq.
- Taanna richterip uuttuutaa malillugu taamaallaat 1,5-mik sakkortussuseqarpoq.
Peter Vossip aamma oqaluttuaraa, Tunumi nunap annikitsumik sajuttarneri naliginnaasuupilussuusut.
- Tasiilap eqqaani nunap sajuttarneri sapaatip akunneri tamarluinnaasa tallimat missaanniittut paasineqartarput. Taakkuli annikigaarmata inunnit tamatigut taakku malugineqarneq ajorput aamma merlanerpaat Tasiilamit ungasissumiittarmata.
Danmarkip Kalaallit Nunaatalu ujarassiuutut misissuisarfianit, GEUS-imi nunap sajuttarneranik ilisimatuup, Peter Vossip aamma oqaluttuaraa, Tasiilap eqqaani nuna sajunnerpaagami richterip uuttuutaa malillugu 4,5-mik annertussuseqarsimasoq.
