GEUS: Nunap sajunnerata kingorna innuttaasut ernumassanngillat
Ataasinngormat unnukkut nalunaaqutaq 20.49 Atammimmit kilometerinik 25-nik, Maniitsumit kilometerinik 65-inik Nuummiillu kilometerinik 94-inik ungasitsigisumi nuna sajuppoq.
Nunap sajunnerata inissisimaffia nunap assingani tassaavoq 65°00'54.0"N 51°54'54.0"W, richterskalamillu uuttorlugu 4,9-mik sakkortussuseqarluni.
AAMMA ATUARUK Nunap sajunnera sineriatsinni nalunaarutigineqartoq
- Kalaallit Nunaannut tunngatillugu nunap sajunnera sakkortuvoq, Kalaallit Nunaannili nunap sajuttarnera takornartaanngilaq. Aamma nunarsuaq tamaat eqqarsaatigissagaanni nunap sajunneri taama sakkortussuseqartut arlallit ullut tamaasa pisarput, GEUS-imi ilisimatusartut pisortaat seismologilu, Trine Dahl-Jensen, KNR-imut taama oqarpoq.
Uivernissamut pissutissaqanngilaq
Innuttaasut arlalissuit nunap sajunnera Facebookkikkut allaaseraat. Ajoqusertoqarsimaneranilli maannamut tusarliussaqartoqanngilaq. Aamma ippassaq unnukkut nunap sajunnerata kingorna immikkut iliuuseqarnissamut pissutissaqanngilaq.
- Arlaatigut iliuuseqartariaqanngillat, nunammi sajunnera taama sakkortussuseqartoq navianaateqarpianngilaq, nunap sajuffianerpiaq inissisimasimanngikkaanni. Taamaammat inuunertik pisarnermisut ingerlatiinnassavaat, Trine Dah-Jensen oqarpoq.
AAMMA ATUARUK Beredskab er forberedt på jordskælv i Tasiilaq
Nunallu sajunnera taama sakkortussuseqartoq pigaangat, kingorna nunap sajuppillanneri sakkukinnerusut pisarput. Taamaattoqarnissaali erseqqissumik oqaatigineqarsinnaanngitsoq seismologip erseqqissaatigaa.
- Kingorna nunap sajuppillanneri sakkukinnerusut pisarnerat eqqorpoq, taamaattoqassanersorli oqaatigisinnaanngilara nunap sajunnissaa siumut oqaatigereersinnaannginnatsigu - taamatuttaarlu aamma kingorna sakkukinnerusunik sajuppillaqqissanersoq.
Innuttaasut misigisimasaat GEUS-ip tusarusuppai
Ataasinngormat unnukkut nunap sajunnera sumi qanorlu malugineqarsimanersoq tusassallugu GEUS- soqutigisupilussuuaa. Tamakkuninngami nalunaarutit nunap sajuttarnerata paasisaqarfiginerunissaanut ilisimatusartunut pingaaruteqarput, Trine Dahl-Jensen oqaluttuarpoq.
- Nunap sajussimaneranik nalunaarutinik pissarsigaangatta tamatuma qanoq sakkortutigisimaneranik nalilersuisinnaasarpugut - aamma uuttortaanngikkaluarluta. Taamaammat uatsinnut pingaaruteqarpoq paasissallugu nunap sajunnera ungasissutsini assigiinngitsuni qanoq sakkortutigisumik malugineqarsimanersoq. Kalaallit Nunaanni nunap sajuttarnerata qanoq inissimaneranik paasisaqarnerunissatsinnut tamanna iluaqutaassaaq, seismologi oqarpoq.
Nalunaarutit GEUS-ip nittartaatigut nassiussinnaavat.