Nunap sajunnera sineriatsinni nalunaarutigineqartoq
Nunap ataasinngornermi unnukkut nalunaaqutaq qulingiluanngunngitsiartoq sajunnera pillugu innuttaasut Maniitsumiit, Nuummiit, Atammimmiit, Napasumiit Kangerlussuarmiillu facebookimi quppernerminni allapput.
Nunatsinni politiit innuttaasunit arlalinnit aamma saaffigineqarput. Nunalli sajunnera pillugu paasissutissarsinngillat.
- Sajunnera uagut maani aamma malugaarput, GEUS-imiilli pisortatigoortumik paasissutissinneqarnissarput utaqqivarput, tamanna aqagu (marlunngornermi aaqq.) aatsaat pissajunnarsivoq, pigaartut pisortaat, Aqqaluk Petersen KNR-imut oqarpoq.
Amerikamiut nittartagaat earthquake.usg.gov naapertorlugu nunap sajunnera Maniitsup kujataata kangisissuani, 69 kilometerisut ungasitsisumi pivoq, Richterip nunap sajunneranut uuttuinera 4,5-imiippoq. Tamannali GEUS-imit uppernarsarneqanngilaq.
Nunap sajunnera malugisimagukku KNR-imit tusarfigerusuppatsigit. Uunga allassinnaavutit news@knr.gl.