Neriuffik oqarasuaat atorlugu katersuipput

Nappaassuaq kræfti akiorniarlugu suliniaqatigiiffiup, Neriuffiup, nuna tamakkerlugu aningaasanik katersuiniarnerminni oqarasuaat atorlugu siullermeersumik katersuipput.

Aningaasanik tunisiniarnermi oqarasuaatip atorneqarsinnaanissaa Tele Greenland suleqatigalugu piviusunngortinneqarsinnaasimavoq.

Aningaasanik katersineq novembarip ulluisa 28-anni aallartippoq, ukiullu nutaap aallartinnissaata tungaanut ingerlassalluni.

Nappaassuarmik kræftimik eqqugaasimasut aningaasanik tunineqarnerisigut qiimmassarniarneqarput, aningaasallu amerlanersai tamatumunnga atorneqassapput, ilaalu kræftimik eqqugaasimasut oqaloqatigiinnikkut iluaquserniarneqarnerinut atorneqassallutik, Neriuffiup siulittaasua Johanne Olsen oqarpoq.

Kræftimik eqqugaasimasunik juullip qaammataani aningaasanik tunisiniaruit telefonnormu 163-imut sianersinnaavutit, 25 koruuninillu tunisillutit. Marloriaataanik, tassa 50 koruuninik, tunisiniaruit normu 166-imut sianerlutit tunisisinnaavutit kiisalu 100 koruuninik tunisiniaruit 169-imut sianersinnaallutit.