Aallartitaq: NATO-p Issittoq akuliuffigissanngilaa

- Issittumi sakkutooqarnikkut ineriartortitsisoqassanngilaq aamma NATO Issittumi pissutsinut akuliutissanngilaq. Issittumi Siunnersuisoqatigiinni ilaasortatut allanit akuliuffigineqarata sakkutooqarnikkullu siooranartoqanngitsumik suulluunniit aaqqiissuteqarfigisinnaavagut, aallartitaq taama oqarpoq.
 
Issittumi nunanit sinerialinnit tallimaasunit sisamat - tassalu Danmark Nunarpullu, USA, Canada Norgelu - NATO-mut ullumikkut ilaasortaapput. Taakkulu tamarmik immikkut sakkutooqarnikkut Issittumi suliaqarsinnaatitaapput. Tamannali NATO-kkoortumik pissanngilaq.

AAMMA ATUARUK Issittumi nunat annaassiniarnermik ujaasinermillu sungiusaqatigiilersut

Ruslandip Issittumi siooranaateqarnera Nunani killerni akuttunngitsumik eqqartorneqartarpoq. Ilaatigut Ruslandip ukiuni kingullerni nunap sineriaani Ruslandilu avannaqqullugu kangianut aqqut atuarlugu sakkutooqarfiusimasunik ammaaqqilluni sakkutuuliisimanera pissutigalugu.
 
Russit Issittup sineriaani sakkutooqarnerat Mikhael Vanin naapertorlugu Issittumi sakkutooqarnikkut aporaattoqarsinnaaneranik pissuteqarani Issittumi imaatigut angallannerup soqutigineqaleraluttuinnarneranik pissuteqarpoq. Matumanilu inuttaliilluni nakkutiliisoqarnissaa pisariaqartoq, russit Danmarkimi aallartitaat Arktisk Nytimut taama oqarpoq.