Issittumi nunat annaassiniarnermik ujaasinermillu sungiusaqatigiilersut

Issittumi nunat akornanni suleqatigiinneq nukittorsarniarlugu suleqatigiffik Arctic Coast Guard Forum sungiusartitsisuussaaq, Issittumi Sakkutooqarfik taama allappoq.

Ataatsimoorluni ujaaseqatigiittarneq annaassiniaqatigiittarnerlu sungiusarneqassapput. Islandimi illoqarfiit pingaarnersaat Reykjavik sungiusarnermi aallavigineqassaaq Nunattalu Islandillu akornanni Danmarksstrædetimi ingerlanneqassalluni.

Nunat tamarmik immikkut umiarsuarnik, timmisartunik suluusalinnik qulimiguulinnillu peqataatitaqassapput, peqataasullu assigiinngitsorpassuit attaveqaqatigiinnissannut atortorissaarutit Ruslandimit isumagineqassallutik.

Danmarkimit, Nunatsinnit Savalimmiuniillu Issittumi Sakkutooqarfik peqataassaaq, umiarsuaq alapernaarsuut Vædderen aamma timmisartoq Challenger atorlugit.

Suleqatigiiffik Arctic Coast Guard Forum 2015-imi pilersinneqarpoq Issittumilu siunnersuisooqatigiinni nunat ilaasortaasut Canada, USA, Island, Norge, Sverige, Finland, Rusland kiisalu Danmark, Nunarput Savalimmiullu ilanngullugit, suleqatigiiffimmut ilaapput.