Nanortalimmiut kattunnissamut ammanerulerput

Nanortalimmi kommunalbestyrelsimi amerlanerussuteqartut kissaatigisimagaluarpaat kommuninut kattunnissamut taarsiullugu pituttorsimasumik suleqatigiinnissaq kisiannili Inatsisartunit tamanna akuerineqarsimanngilaq.

Kristine Raahauge Kujataamioqatigiit Narsami isumasioqatigiinnerat allartimmat oqalugiarami ilaatigut oqarpoq.

- Kommunalbestyrelsi illoqarfimmi nunaqarfimmilu tamani innuttaasunik ataatsimiisitsisarsimavoq. Tamatuma erseqqissumik takutissimavaa piumsaqaatit pingasut aallavigalugit kommunit kattunnissaat akerlerineqanngitsoq.

Tassaapput siullermik kiffartuunneqarnerup ajorseriannginnissaa. Aappassaatut aallaffissornikkut qitiusoqarfiit pingasuujuaannarnissaat. Kiisalu illoqarfimmi nunaqarfinnilu innuttaasut sunniutaat oqartussaqataanerallu ajorseriassanngitsoq.

- Taamaattumik taakku tunngavigalugit Qaqortumut Narsarmullu kattunnissaq angerparput, Kristine Raahauge taama naggaasiilluni oqareermat isumaasioqatigiit tamarsuarmik ersaattaapput.

Ualip sinnera Nanortalimmi, Qaqortumi Narsamilu qinikkat atorfilittallu, eqimattani oqaluuseraat siunissami kommunit kaatukkunik politikkikkut aqutsineq qanoq iluarsartuunneqassanersoq aammalu kissaatigisat suuneri, tulleriiaarinissaat qanorlu aningaasatigut aqutsisoqassanersoq.