Ittoqqortoormiit: Nannunik qanillattortoqartarnera toqqissisimatsinngitsoq

Nannunik inunnut saassussisoqartarnera qaqutigoortorujussuugaluartoq, inuit marluk qaammatini marlunni saassunneqarput.

Illoqarfimmullu qanittumi nanoqartarnera najugalinnut toqqissisimananngitsoq, piniarnermut nakkutilliisoq oqarpoq.

- Nannut taama tikeqattaaleraangata, ingammik uteqattaaleraangata, maani innuttagut, ingammik atuartuutillit toqqissisimanngitsorujussuanngortarput, meerartik atuariartortinnissaa ilaatigut aarleqqutigisarlugu, piniarnermut nakkutilliisoq, Erling Madsen, nannumik saassussisumik sapaatit akunnerata siuliani toqutsisoq, oqarpoq.

Angut alla Uunartermi marsimi saassunneqarpoq,.

Nannut qaqutigorujussuaq saassussisaraluartut, piniarnermut nakkutilliisoq oqarpoq.

- Siornatigut taamatut pisoqarneranik tusagaqarnikuunngilanga.

AAMMA ATUARUK Piniarnermut nakkutilliisoq nannumit saassunneqangajalluinnartoq

Nannunik qimaatitsiniarluni piffissami kingullermi ilungersorsimalluni Erling Madsen oqaluttuarpoq.

Nannullu illoqarfimmi initusut Ittoqqortuumi najugaqartoq Eva-Mette Lorentzen oqarpoq.

- Soorunami toqqissisimananngilaq, nannut qanittuneranni qitornaqartilluta aamma uagut taava annilaangakusoorluni  isumaalunnartarpoq, naammatuuiniaqattaattarnissaat, Eva-Mette Lorentzen oqarpoq.

Politiineersorlu Torben Klose naapertorlugu, illoqarfik aputeqaqimmat, aqquserngit aputaajaramik itisoorujussuanngornerat ernumanerulersitsivoq.

- Aqquserngit aputaajarneqaleruttorput, sumilu tamaani niffakoqaqaaq, ilaat 4 meterisut portutigisut. Aqquserngit sangujoraarnertaqarmata, siuneq soqarnersoq takusassaaneq ajorpoq, taamaammallu sangorissani ersinngitsumi nanoqassasoralugu annilaanganartarluni, Torben Klose oqarpoq.

Tamannalu Eva-Mette Lorentzenip ilisarisinnaavaa, nannullu illoqarfimmi oqallisaasartut oqaatigalugu.

- Soorlu qallivallaaraaleraangata toqunnissaalluunniit kissaatigillugu qitornavut isumaalunnartarmata, Eva-Mette Lorentzen oqarpoq.

Najugaqartullu naammagittaalliortartut, Erling Madsen oqarpoq.

- Naammagittaalliortunik saaffigineqallattaartarpugut. Kisianni tassa pisussaaffigigatsigu avammut qimaatinniarsarisarnissaat, aamma amerlanertigut qujanartumik taanna iluatsittarpoq, piniarnermut nakkutilliisoq Erling Madsen, nannunik qimaatitsisarnissamut atortorissaarutinik pitsaanerusunik kissaatigisaqartoq, oqarpoq.