30-t nalusamik spiralilerneqarsimallutik Nakorsaaneqarfimmut naammagittaalliortut

Nakorsaaneqarfik nunatta peqqinnissaqarfik suli tigunngikkaa tigoreeraalu nalusamik spiralilerneqarsimanerminnik arlalinnit naammagittaalliutinik suli anngussivigineqartarpoq.
Lippes Loopimik taaguutilinnik 1960-ikkunni 1970-ikkunnilu spiralilersuisoqarsimavoq. Assi © : DR
januaarip 29-at 2023 11:14
Nutserisoq Hanne Petersen

Danskit oqartussaasui kalaallit amerliartoqqunagit spiralilersuinissamut periusissiornerisa kingunerisaanik nunatsinni arnat tuusintilikkaat spiralilerneqarsimasut, DR-ip podcastimik tusarnaagassiliaa "Spiralkampagnen" 2022-mi maajimi saqqummereersorlu, tamanna nunatsinni oqallisaaqaaq.

DR naapertorlugu 1966-ip 1975-illu akornanni spiralilersuisoqarsimavoq – tamatumali kingorna aamma spiralilersuisoqartarsimasoq paasinarsivoq.

Peqqinnissamut oqartussaaffik nunatta 1992-imi tiguaa, tamannali sioqqullugu nalusamik spiralilerneqarsimanermik Nakorsaaneqarfimmut naammagittaalliutit 26-iupput.

Taakku saniatigut 1992-ip kingorna nalusamik spiralilerneqarsimanermik naammagittaalliuteqartut sisamaasut, Nakorsaaneqarfik KNR-imut ilisimatitsivoq.

Spiralilersuisimaneq naatsumik

 

- DR-imit tusarnaagassiap ”Spiralkampagnen”-ip niviarsiaqqat arnallu tusindilikkaat danskit oqartussaasuisa kalaallit inuiaqatigiit amerliartornerannut killiliiniarlutik 1966-imit 1975-imut spiralilersorneqarsimanerat saqqummiuppaa.
 
- Arnat arlallit spiralilerneqarnertik pinngitsaaliinertut naapertuilluanngitsuliornertullu misigisimallugu tusarnaagassiami oqaluttuaraat.

 

- Naalakkersuisut danskillu naalakkersuisui 1960-imit 1991-imut, tassa peqqinnissamut oqartussaaffiup nunatsinnit tiguneqarnissaata tungaanut spiralilersuisoqarneranik qulaajaanermik aallartitsiniarlutik septembarimi isumaqatigiissutigaat.

Suliap ingerlaqqinnera

 

- Maannali arnat arlallit akuersissuteqaratik spiralilerneqarnermik allanillu naartunaveersaaserneqarnermik 1990-ip 2000-llu akornanni nalaataqarsimallutik oqaatigaat.

- BBC-p arnat sisamat 2000-ikkut aallartinneranni akuersissuteqaratik spiralilerneqarsimasut oqaloqatigai.

- Anna Jørgensen akuersissuteqarani 1995-imi spiralilerneqarsimasoq pillugu oqaluttuaq decembarimi saqqummiupparput.
 
- Emma Kuko spiraleqarluni 2019-imi misissortinnermini ilisimatinneqarsimasoq pillugu oqaluttuaq qaammammi uani saqummiupparput.

Nakorsaaneqarfiup nalusamik naartunaveersaaserneqarsimasut naammagittaalliuuteqarnissaannik decembarimi kaammattorpai. Tuluit nutaarsiassaqartitsiviisa ilaata, BBC-p, 2000-kkut aallartinneranni akuerseqqaarnatik spiralimik allamilluunniit naartunaveersaaserneqarsimanerannik
piviusulersaarusiaa saqqummereersorlu taamaaliorpoq.

Nakorsaaneqarfik tusagassiuutinut taamani ima nalunaarpoq:

- Suliaq ilungersunartorujussuartut isigaarput. Akuersititseqqaarnani katsorsaasoqartarsimappat suliassaq ilungersunartuussaaq malitseqartinneqartariaqartoq.

Arnat 2000-ikkut aallartinneranni akuerseqqqaarnatik naartunaveersaaserneqarsimallutik oqaatigisaat pillugit suliat BBC-p saqqummiussai ilisimasaqarfiginagit, nakorsaaneqarfiup decembarimi oqaatigaa.

Nalusaminik ukiuni qulingiluani spiraleqartoq

28-inik ukiulik Emma Kuko nalusaminik spiralilerneqarsimasunut ilaavoq.

SpiraIeqarluni taassuma 2019-imi paasivaa. Tamanna sapaatit akunnerata siuliani oqaluttuaraarput.
Taanna nalusaminik ukiuni qulingiluani spiraleqarsimassangavoq.
16-inimmi ukioqarluni Tasiilami 2010-mi naartuersinnermini spiralilerneqarsima-

nissi ilimagaa. Allamimmi eqqaasaqarsinnaanngilaq.

Emma Kukop 2010-mi naartuersinneraniit nakorsap spiralimik 2019-imi nassaarnissaata tungaanut, nakorsiarnerani nalunaarsuiffiit tamaasa KNR-ip takuai. Spiralilerneqarsimaneranillu ukiuni taakkunani nalunaarsukkani tamani allaqqasoqanngilaq.

- Pisut ullumikkut oqaluuseraakka, taava nalunngilara kamannera ulluni tulliuttuni takkuteqqissasoq. Tamanna aqukkuminaassinnaavoq, Emma Kuko KNR-imut oqarpoq.

Anna Jørgensen akuerseqaarnani 1995-imi spiralilerneqarsimalluni, KNR-imut aamma oqarpoq. 

Taanna Maniitsumi qitornartaarnerminiit ullualuit qaangiummata spiralilersippoq.

- Misigisaq taamaattussaanngikkaluartoq. Erneriitsiaannartunga nakorsap spiralilermanga ajorpoq. Aammami taamani meeraannannguuvunga, Anna Jørgensen KNR-imut oqarpoq.

Qulaajaasoqassasoq

Arnat arlallit 1960-ikkut 1970-ikkullu akornanni inuusuttuaraanerminni namminneq angajoqqaatilluunniit akuerseqqaanngitsut spiralilerneqarsimallutik siorna oqaluttuarput.

Anniaatigalugulu kingunerluutigisimagaat ilaasalu naartunaveersimassutigisimallugu oqarput.

Naalakkersuisut danskillu naalakkersuisui spiralilersuisoqarsimaneranik qulaajaanissamut isumaqatigiipput. 

Nakorsaaneqarfimmeersumik oqaloqateqarniarsimagaluarpugut, oqaluttuamilli uuminnga saqqummiitinnata pisinnaasoqarnani. Naammagittaaliutit pillugit suliami sumik pisoqqaqqissanersoq apeqqutiginiaraluarparput.