VIDEO Nalunaarusiaq: Nuummi Ilulissanilu timmisartorsuarnut mittarfiliortoqarli
Nalunaarusiami siunnersuutigineqarpoq Nuummi Ilulissanilu timmisartorsuarnut mittarfiliortoqassasoq.
Siunnersuutigineqartut assigiinngitsut marluupput:
- Siullertut siunnersuutigineqarpoq Nuummi Ilulissanilu mittarfiit 1199 meterinut tallineqasasut, taamalilluni sumiiffinni taakkunani angalanerni akit 10%-imik akikinnerulersinnaassammata.
- Siunnersuutigineqartut aappaattut siunnersuutigineqarpoq Nuummi Ilulissanilu 2200 meterisut takitigisunik mittarfiliortoqassasoq. 2200 meterinik takissusilinnik mittarfiliortoqarneritigut sumiiffinni taakkunani akit 20%-iniit 30% tikillugu angalanermut akikillisaataassammata.
Nalunaarusiami siunnersuutigineqartut piviusunngussappata Nunatsinnut takornariat amerlerujussuarnissaat nalunaarusiami siulittuutigineqarpoq.
Aamma atuaruk Mittarfiit tallinneqarnissaannut innersuussutigineqartunut Vittus oqaaseqarsinnaanngilaq
Angalaneq Nuummi Ilulissanilu akikinnerulernissaa nalunaarusiami pisortatigoortuunngitsumik saqqummiunneqartumi atuarneqarsinnaavoq. Akikinneruliinnassanngilarli siunnersuutigineqartummi piviusunngussappata takornarissat Nunatsinnut tikittartut qanoq amerlatigilersinnaanissaat naatsorsorneqarsimavoq.
Ukioq manna takornarissat 26.000-iunissaat naatsorsuutigineqarpoq. Mittarfiillu 2200 meterinut tallineqassappata takornarissat ullumimiit 45.000-inik amerlanerulernissaat naatsorsuutigineqarpoq.
Mittarfiit 1199 meterinik takissusillit sananeqassappata assigiinnarpaa arsaattarfiit 13-it sanileriisikkaanni. 2200 meterisullu takitigisunik mittarfiliortoqassappat arsaattarfiit 24-it sanileriisillugit.
Aamma atuaruk NALUNAARUSIAQ Mittarfiit takinerusut nunatsinnut iluaqutaassapput
Inatsisartut ukiaanerani ataatsimiinneranni Ilulissani Nuummilu mittarfiit oqaluuserineqarnissaat Naalakkersuisumit oqaatigineqarpoq:
- Takornariaqarnermi periusissaq Intasisartut ukiakkut ataatsimiinneranni sammineqalerpat ilanngussatut nalunaarusiaq eqqaaneqartoq taanna saqqummiunneqartussaassammat qularnanngitsumik taassuma imarisai ilanngullugit oqaluuserineqartussaassapput, Inuussutissarsiornermut, Suliffeqarnermut, Niuernermut Nunanullu allanut Naalakkersuisoq, Vittus Qujaukitsoq (S) KNR-imut oqarpoq.
Nuummi Ilulissanilu 2200 meterinik mittarfiliortoqassappat Danmarkimiit Nunatsinnukartut Kangerlussuakkooqqaartarnissaat pisariaarutissasoq nalunaarusiami aamma allaqqavoq.
