Politikki Inuussutissarsiutit

NALUNAARUSIAQ Mittarfiit takinerusut nunatsinnut iluaqutaassapput

Nalunaarusiami siunnersuisarfimmit Rambøllimit suliarineqartumi, pisortatigoortumillu suli saqqummiunneqanngitsumi, Nuummi Ilulissanilu mittarfiit 2200 meterinut tallineqassarnissaat innersuussutigineqarpoq.

Allattoq Jonas Fievé, Jaaku Lyberth

aggustip 18-at 2015 14:28

Nalunaarusiami innersuussutigineqartut naapertorlugit takorniariat tikittartut ullumikkut 26000-it missaanniittut mittarfiit tallineqarnerisa kingorna ukioq 2040-mi marloriaataannik amerlisimassasut.

Mittarfiit tallineqarnerisa kingorna timmisartuutileqatigiiffiit timmisartut anginerusut atorlugit Nuummut Ilullissanullu tikittalissapput amerlanerusunillu ilaasoqarlutik. Siunnersuisarfiup Rambøllip innersuussutaa naapertorlugu billitsit akii 20 aamma 30 procentit akornanni akikinnerulissapput.

Aamma atuaruk Kirkegaardip Ilulissani mittarfiup tallineqarnissaa siunnersuutigaa

Nalunaarusiaq Inuussutissarsiornermut, Suliffeqarnermut, Niuernermut Nunanullu Allanut Naalakkersuisoqarfimmit suliffeqarfimmut siunnersuisarfimmut Rambøllimut suliakkiutigineqarpoq, nalunaarusiarlu pillugu naalakkersuisunut ilaasortaq Vittus Qujaukitsoq KNR-imit oqaaseqartinniarneqaraluarpoq mannalu tikillugu oqaaseqartinneqarsinnaasimanani.

Aningaasanut inatsisissatut siunnersuummut missingersuusiami Naalakkersuisunit sapaatip akunnerani kingullermi saqqummiunneqartumi, Nuummi Ilulissanilu mittarfiit tallineqarnissaannut pilersaarusiornermut aningaasanik immikkoortitsisoqarpoq, kisianni Aningaasaqarnermut Naalakkersuisoq Andreas Uldum mittarfiit pillugit oqaaseqaqqinniarani nalunaarpoq.