Nalunaarusiaq kommunip attartortitsisarnermut periusaa pillugu: Pilersaaruteqannginnerata attartortut qularnartumiitsilerai
Kommuneqarfik Sermersuup innuttaasunut inissianik nutaanik pissarsinissamut periuseq 2016-imi atulerpaa.
Kommunip inissianik attartornissamut isumaqatigiissutit arfinillit siulliit suliffeqarfinnut namminersorlutunut matumani atsiorpai. Isumaqatigiissutit taakku sivikinnerpaamik ukiut qulit qaangiuppata qaangiuttussaapput, kommunillu inissiat taakku attartortissinnaavai.
Kommunip taamaaliornini inissianik 400-nik, Nuummi innuttaasunut attartortissinnaasani pissarsissutigaa.
Kommunilli suliffeqarfinnut namminersortunut isumaqatigiissutai siulliit 2027-p aamma 2030-p akornanni qaangiuppata inuit inissiani attartukkani najugaqartut sussappat?
Kommunip tamatuma iliuuseqarfiginissaa pilersaarusiorsimanngilaa.
Aamma naak inissianik attartornermut isumaqatigiissutit arlallit ullormi isumaqatigiissutip atorunnaarfiani nuunnissaannik allassimasoqaraluartoq.
Kommuneqarfik Sermersuup inissiaqarnermut susassaqarfiata aqunneqaranik kukkunersiuisut suliffeqarfiata, Deloittepip nalunaarsuiaani tamanna allassimavoq.
Borgmesteri: Atorunnaarnissamut iliuusissiorneq aallartereersoq
Kommunip inissiatut nalinginnaasutut attartortitsinissamut siunertaqarluni attartornermut isumaqatigiissutai katillugit aqqaneq-marluupput.
Borgmesterilli, Charlotte Ludvigsenip (IA) oqarnera naapertorlugu aaqqiissutissiortoqarpoq.
- Allaffeqarfiup attartornermik isumaqatigiissutigisimasatta atorunnaarnissaannut iliuusissiornissaat siornali noqqaassutigaara, borgmesteri Charlotte Ludvigsen oqarpoq, nangillunilu:
- Ukiup naanerani iliuusissiaqarsimalernissarput naatsorsuutigaara.
Attartortitassanik attartornermik aaqqissuussat piffissami sivitsortumi oqallisigineqarpoq.
Inissiaqarnermi periaaseq malittarisaassanik unioqqutitsisoq
Ulloq 9. novembari 2021 Namminersorlutik Oqartussat Nakkutilliisuisa kommunip ingerlatsivinnut namminersortunut sivisuumik atuinissamut isumaqatigiissuteqaqqinnissaa unitsippaat, tassani kommunip inissiat nalinginnaasutut Iserit aqqutigalugu attartorteqqittarai.
Periaaseq taanna kommunip 2015-imiilli inissianik pissarsiniarluni atortarsimavaa.
Nakkutilliisut nalilerpaat periaaseq taanna kommuninut pisinnaatitsisummik uniuinerusoq.
Sivisuumik attartornissamut isumaqatigiissutaammata aaqqissuussineq kommunimut milliuunerpassuarnik aningaasartuutaavoq.
Assersuutigalugu aaqqissuussineq kommunimut 2020-mi 11 milliuuninik 2020, 2021-mi 17 milliuuninik ukiorlu manna 27 milliuuninik aningaasartuutaavoq.
Aaqqissuussineq kommunip qanoq iliorsinnaaneranut qanorlu ilioqqusaannginneranut malittarisassaanik unioqqutitsisoq, Namminersorlutik Oqartussat Nakkutilliisuisa siorna novembarimi oqaatigaat.
AAMMA ATUARUK Professori inissiat pillugit nalunaarusiaq uissuumminartoq pillugu: Ajornartorsiutaasut malunnartumik amerlapput
Aaqqiissut taanna Deloittemit nalunaarusiami aamma isornartorsiorneqarpoq.
Isumaqatigiissutiniimmi aqqaneq-marlunnit arlaannaalluunniit kommunip akinik pitsaassutsinillu pitsaanerpaamik qulakkeerinissaa pillugu suliariumannittussarsiuunneqanngillat. Tassunga taarsiullugu inissianik attartortitsinissamut soqutiginnittut saaffiginnissuteqarnerat tunngavigalugit ilaatigut isumaqatigiissutigineqarput.
Nalunaarusiap isumaqatigiissutit piginnittunut nalinginnaanngilluinnartut pineqartut erseqqissaatigaa. Inissiat attartortumit tiguneqarneratulli tunniuteqqinneqartussaanerat ilaatigut pissutigalugu.
Aaqqiissut Aalborg Universitetimi aningaasaqarnermik aqutsinermi professorimit, Per Nikolaj Bukhimit aamma isornartorsiorneqarpoq.
- Attartortunut namminersortunut isumaqatigiissuteqarneq periarfissaavoq nalinginnaanngitsoq isornangaatsiartorlu taamaalillunimi akisuunik pisiortornermi inuiaqatigiinnut aningaasanik annaasaqartitsivoq, Per Nikolaj Bukh KNR-imut oqarpoq.
Siumut: Ilungersunarluinnarpoq
Illuatungiliuttut partiia Siumut, Inga Dora Markussen siuttuliullugu kommunip ineqarnermut periusaanut atatillugu politikkikkut akisussaatitsisoqarnissaanut siunnersuuteqarnikuugaluarpoq.
Tamannali kommunalbestyrelsemi amerlanerussuteqartunit itigartitsissutigineqarpoq.
- Inissianik sanaartornissamut innuttaasunullu kiffartuussinerup pitsanngorsarnissaanut aningaasaqassannginnitta kinguneri malugaagut, tassa assigiinngitsorpassuarnik eqqumiitsunik ilungersunarluinnartunillu pisoqarsimanera uppernarseqqiinnarparput, Inga Dora Markussen oqarpoq.
AAMMA ATUARUK Borgmesterip isumaqatigiinngissut mianernartoq Nakkutilliisunut inissikkaa
Taassuma Namminersorlutik Oqartussat Nakkutilliisuisa novembarimi isornartorsiuinera, kommunip inissianik attartornermut periusaanut tunngasoq innersuussutigaa.
- Pisumi uani ukiut qulit qaangiuppata isumaqatigiissutit atorunnaarpata assinganik inissisimaleqqittussaalluta millionit koruunerpasuit pisariaqanngitsumik atorpagut. Ajornartorsiutaasumik kinguartitsineruvoq, taamaammat aaqqiissuteqartoqanngilluinnarpoq. Aningaasatigut annaasaqangaatsiarneruvoq, Inga Dora Markussen oqarpoq.
Taama isumaqatigiissuteqartoqaqqissanngitsoq
Attartortitassanik attartornermik aaqqiissuteqarneq nunatsinni 2016-imi atulermat tamanna nutaarluinnaasoq nalunaarusiami allassimavoq.
Attartornermut inatsimmut isumaqatigiissutillu aqqaneq-marluk atorunnaarnissaannut tunngatillugu attartortitassanik attartornermi kommunip piginnaatitaaneranik malinninnissamut aallaqqaammullu isumaliuteqarnikkut uppernarsaasoqarsimanngitsoq nalunaarusiami erseqqissaatigineqarpoq.
Borgmesteri, Charlotte Ludvigsen Sermersuumi 2019-imili borgmesteriulerpoq, taassumalu kommunip ineqarnermut periusaa qasssseriarluni illersortarsimavaa.
Taassuma inatsit tassunga atatillugu erseqqissimannginnerarpaa.
- Tassunga tunngatilluug suut kukkussutaanersut takujuminaapput. Inissiat 400-it missaanniittut pissarsiarinikuuagut. Taamaaliorsimanngikkaluarutta maannakkut najugaqartut ukiuni 15-ini suli inissiarsiartuni utaqqisuniissagaluarput. Periuseq una illoqarfitsinnut siuariartortitsilluni ineriartortitsisoraara, Charlotte Ludvigsen oqarpoq.
Nakkutilliisulli aalajangernerata kingunerisaanik kommunip ineqarnermut periuseq pineqartoq atorunnaarsissimagaa oqaatigaa.
Inga Dora Markussenilli tamanna naammanngissoraa
Taassuma borgmesteri akisussaaffimmik tigusilluni tunuartariaqarsoraa:
- Borgmesteri maanna pinitsinnut akisussaaffeqangaatsiarpoq, aaqqiissullu taanna kommunimut pitsaanerpaamik aaqqiissutaaneraqqilluni, borgmesterip aaqqiissut illersuinnaavippaa, Inga Dora Markussen oqarpoq.