Borgmesterip isumaqatigiinngissut mianernartoq Nakkutilliisunut inissikkaa
Ineqarneq pillugu suliamik taaneqartartoq Nakkutilliisuutitat ilaasortaasa isummerfigisussanngorunarpaat.
Tassami massakkorpiaq inatsisitigut akerleriinneq Namminersolrutik Oqartussat kommuninut nakkutilliisuisa aamma Kommuneqarfik Sermersuup akornanni ingerlavoq.
Kommunalbestyrelsemi amerlanerussuteqartut Sermersuup ineqarneq pillugu periaaserisaata inatsisinik malinninnerunersoq imaluunniit unioqqutitsinerunersoq pillugu politikikkut akisussaaffimmik inissiinissaannut siunnersuut itigartitsissutigimmassuk illuatungeriit tamarmik immikkut isumaqarfigaat.
Taamaattumik borgmesterip Charlotte Ludvigsenip (IA) Nakkutilliisuutitat suliamut ilanngutitinniarpai..
- Suliami uani Nakkutilliisut isumaqatiginngilakka, Charlotte Ludvigsen oqarpoq.
- Kommunalbestyrelsep oqallisissaq qanoq ilinerani itigartitsissutigisinnaaneraa tunngaviusumik periaatsimut tunngasuuvoq. Nakkutilliisut qinnuiginiarpavut suliami isumaqatigiinngissuterput pillugu nalileeqqullugit.
- Suliami uani Nakkutilliisuutitat Nakkutilliisutut isumaqarpata, taava soorunami oqaluuserisassaq kommunalbestyrelsep oqaluuserisassaanut ilanngutisssavarput, borgmesterip ilannguppaa.
Tilsynet (Nakkutilliisut) aamma Tilsynsrådet (Nakkutilliisuutitat) assigiinngissutaat
Nakkutilliisut:
Nakkutilliisut Nunamut Namminermut Naalakkersuisoqarfimmut atapput.
Nakkutilliisut ilaatigut akisussaapput kommunit aalajangigaat inatsisinik malinninnersut nakkutigissallugit.
Nakkutilliisut aamma Nakkutilliisuutitanut allattoqarfiupput.
Nakkutilliisuutitat:
Naalakkersuisut kisimik Nakkutilliisunut suliaq ingerlatissinnaavaat.
Nakkutilliisuutitat ilaasortaqarput siulittaasumik ataatsimik ilaasortanillu sisamanik Inatsisartunit aamma kommuninit toqqakkanik.
Massakkorpiaq ilaasortat tassaapput Inuit Ataqatigiinniit marluk aamma Siumumiit marluk.
Nakkutilliisuutitat nakkutigissavaat kommunalbestyrelsit ingerlatsinerminni kommunit aqunneqarnerat pillugu inatsit aamma oqartussanut eqqartuussisoqarnermut malittarisassat malinneraat.
Naalakkersuisut kisimik suliamik Nakkutilliisuutitanut suliassiisinnaapput.
Tamanna Kommuneqarfik Sermersuup suliffeqarfiit namminersortut inissianik inissiaatileqatigiiffitsik Iserit aqqutigalugu attartorteqqitassaminnik siunertaqarlutik attartornissamut isumaqatigiissuteqarsimanerata inatsisinik naapertuuttoqannginnerani pivoq.
Kommunip attartortitsinerani inissiamik attartortunit isertitat attarnermi aningaasartuutinut naapertuutinngillat.
Siumut: Inatsisilerinikkut isumaqatigiinngissutip oqaloqatigiinnissaq pingaarutilik akornuserpaa
Kommunip ineqarneq pillugu periaasianut politikikkut akisussaasumik inissiinissaq pillugu siunnersuut Siumut-gruppemit saqqummiunneqarpoq.
Kisiani amerlanerussuteqartunit itigartitsissutigineqarpoq, taamalu oqaluuserisassaq ulloq 18. februaari kommunalbestyrelsemi immikkut ataatsimiinnermi suliarineqanngitsoorpoq.
Nakkutilliisut kommunimi aalajangikkat inatsisinut naapertuunnerannik nakkutiginnittut isumaqarput oqaluuserisassaq isumaqatigiinngissutigineqartoq kommunalbestyrelsimut piginnaatitsissutit iluanniittoq.
Taamaattumik Nakkutilliisut kommunalbestyrelse kaammattorpaat oqaluuserisassaq piaarnerpaamik suliareqqullugu.
Siumumi grupperformandip Inga Dora G. Markussenip soorunami naliliineq nuannaraa:
- Kommunalbestyrelsemi oqaluuserisassap suliarineqrsinnaanerata ilumoortuunera takullugu nuannaarutigaara. Itigartitsissutigeqaannarsinnanngitsoq oqqarluni kommunalbestyrelsemi suliarineqarsinnaanngitsoq, politikeri Siumumeersoq oqarpoq.
Inissiaqarnermi periaaseq malittarisaassanik unioqqutitsisoq
Ulloq 9. novembari 2021 Namminersorlutik Oqartussat Nakkutilliisuisa kommunip ingerlatsivinnut namminersortunut sivisuumik atuinissamut isumaqatigiissuteqaqqinnissaa unitsippaat, tassani kommunip inissiat nalinginnaasutut Iserit aqqutigalugu attartorteqqittarai.
Periaaseq taanna kommunip 2015-imiilli inissianik pissarsiniarluni atortarsimavaa.
Nakkutilliisut nalilerpaat periaaseq taanna kommuninut pisinnaatitsisummik uniuinerusoq.
Sivisuumik attartornissamut isumaqatigiissutaammata aaqqissuussineq kommunimut milliuunerpassuarnik aningaasartuutaavoq.
Assersuutigalugu aaqqissuussineq kommunimut 2020-mi 11 milliuuninik 2020, 2021-mi 17 milliuuninik ukiorlu manna 27 milliuuninik aningaasartuutaavoq.
Kisianni borgmesteri naapertorlugu oqaluuserisassaq aatsaat ikkuteqqinneqarsinnaavoq Naalakkersuisut suliaq Nakkutilliisuutitanut suliassanngortippagu, Nakkutilliisuutitallu ilaasortaasa Nakkutilliisut naliliinerat isumaqatigippassuk.
Inga Dora G. Markussenilu naapertorlugu takussutissavoq borgmesterip ineqarneq pillugu suliamut kina akisussaanersoq borgmesterip oqaluuserineqarnissaa kissaatiginngikkaa.
- Una takussutissaavoq nassuerutigineqarumanngimmat suliaq iternga tikillugu oqaloqatigineqartussaasoq. Ima paasivara matuinnarneqarniartoq aakkanngortillugulu teknikikkut tunngasumut saatillugu uagutsinnut saqqummiunneqartumut taarsiullugu. Tassa Nakkutilliisut aalajangigaat, Inga Dora G. Markussen oqarpoq.
- Kisianni amerlanerussutillit tamanna kissaatiginngilaat. Qatsutilaavippara inatsilerinikkut imaaliinnarlugu paasisassaanngitsuliornemut saatinneqarmat suliap oqallisiginissanut taarsiullugu, nangippoq.
Kommune: Politikikkut akisussaaffeqartoqanngilaq
Kisianni borgmesterip aamma kommunip eqqartuussissuserisuata Nakkutilliisut Siumullu isumaqatgiinngilai.
Kommunip eqqartuussissuserisaanit suliaq pillugu allakkiami ulloq 26. februaarimeersumi erserpoq oqaluuserisassap oqaluuserineqarnissaanut itigartitsineq eqqortuusoq. Eqqartuussissuserisoq naapertorlugu ilaatigut peqqutaavoq kommunini politikimi akisussaaffeqartoqanngimmat.
- Kommunalbestyrelsit pillugit inatsit qiviarutsigu politikikkut akisussaaffimmik takussaasoqanngilaq. Politikikkut akisussaaffeqarneq taamaallaat Naalakkersuisunut atuuppoq, tatiginninnginnermik nalunaartoqarpat, Charlotte Ludvigsen oqarpoq.
- Siunnersuutip siunertaa atuaraanni ataaseq anguniarpaat, tassa uanga siuleralu akisussaaffimmik tigusissasugut pisuutinneqarlutalu. Tamannalu kommunalbestyrelsimut piginnaatitsissutip avataaniippoq, borgmesteri itisiliivoq.
Kisianni Siumukkut isumaqarput isornartorsiutit Nakkutilliisut siorna novembarimi saqqummiussai kommunalbestyrelsep isiginngitsuusaarsinnanngikkai.
Tassani Nakkutilliisut kommune peqquaat ukiorpaalunni periaaserineqartoq kommunip inissianik pissarnissaminut atortarsimasaa unitseqqullugu.
Saniatigullu Nakkutilliisuutitat ineqarneq pillugu suliamik misissuinerata takutippaa kommunip sulianik ingerlatsinera arlaleriarluni torinngitsuusoq aamma kommunip ingerlatsisui Aningaasaqarnermut Ataatsimiititaliap akuersinissaa avaqqullugu iliuuseqartarsimasut.
- Suliami uani borgmesterip akisussaaffia oqaluuseriumavarput aamma arlalinnik isornartoqarsimammat atsiortoqarsimalluni aamma Aningaasaqarnermut Ataatsimiititamut taamani saqqummiussisoqartarsimanngimmat aamma massakkut borgmesteriusup nalaani. Taakku qaqinneqarnissat pingaartuuvoq, Inga Dora G. Markussen oqarpoq.
