Naleraq spirali pillugu tamanut ammasumik ataatsimiikkumasoq – ataatsimiinnermut matoqqasumut maanna ataatsimiigiaqquneqartut
Naleqqap spiralilersuinermut tunngatillugu suliap nunasiaateqarnermiillu ullumikkumut iliuuserisimasat pillugit Inatsisartuni qanoq isummertoqarneranut tunngatillugu immikkut ittumik ataatsimiittoqarnissaa qanittukkut kaammattuutigaa.
- Qanoq isumaqarnitta paasinissaa pingaaruteqarpoq - uagut taamaaliugaasugut. Soqutigisaqarnata nipaatsumik akuersaaginnarpugut imaluunniit qanoq isumaqarpugut? Tamanna oqaatigissallugu pingaaruteqarpoq, inuiannut uagutsinnuinnaanngitsoq aammali nunanut allanut, Naleqqap siulittaasua Pele Broberg KNR-imut oqarpoq.
Apeqquteqaalli taanna suli akineqanngilaq.
Partii tusagassiuutinut nalunaarummi taama allappoq.
- Naleqqap spirali pillugu suliaq nunat tamalaat eqqartuussivianni suliarineqassanersoq isummerfigeqqullugu partiinut allanut kaammattuutigaa, partii allappoq:
- Partiit arlaannaalluunniit tamanut ammasumik maannamut akissuteqarsimanngilaq.
Naleqqalli partiillu allat suliaq pillugu matoqqasumik ataatsimiigiaqqusaanerat tusagassiuutinut nalunaarummi allassimavoq.
- Partiit spirali pillugu suliamut tunngatillugu matoqqasumik naalakkersuisumut ataatsimiigiarnissamut maanna qaaqquneqarput.
Matut matoqqanissaat pisariaqanngitsoq
Siumut Naleqqallu spiralilersuisimanermut tunngatillugu suliaq nunat tamalaat eqqartuussivianni suliarineqassasoq piumasaralugu oqaatigereerpaat.
Spiralit pillugit nalunaarusiat marluk aggustip naanerani saqqummiunneqareersullu taama isummerput.
Inuit pisinnaatitaaffiinik unioqqutitsinerit nalunaarusiani taakkunani marlunni maluginiarneqarput, nalunaarusialli aappaannaani Danmarkip arnanik akuersititseqqaarani 1960-ikkunniilli spiralilersuisarsimanera inuiannik toqoraanertut immaqa nalilerneqarsinnaasorineqarpoq.
Naleqqap matoqqasumik ataatsimiinnermi peqataanissani, taamaattorli suliaq pillugu isummiussai ataatsimiinnermi matoqqasumit toqqorterneqassanngitsut, tusagassiuutinut nalunaarummi nutaami erseqqissarpaa.
- Isummatta isertuunnissaa pisariaqartinngilarput. Isertuutinngilarput - aamma ataatsimiinneq sioqqullugu, Pele Broberg tusagassiuutinut nalunaarummi oqarpoq:
- Partiit allat allatut isumaqaraluarunik tamanna aamma innuttaasunut ammasumik oqaatigisariaqarpaat.
Partiit allat spiralilersuisimanermut tunngatillugu suliap nunat tamalaat eqqartuussivianni suliarineqassanersoq isummerfigissagaat aamma kajumissaarutigaa:
- Paasissutissat isertuunneqartut saqqummiunneqassappata matoqqasumik paasissutissiinissaq pisariaqarsinnaavoq, kisianni paasissutissat ataasiakkaat isertuunneqarnissaat politikkikkut oqallinnerup isertuunnissaanut tunngavissaanngilaq, Pele Broberg oqarpoq.
