Naleqqap Nuuk Imerup kisermaassinera ukiortaap kingorna unitsikkusukkaa

Puiaasat pillugit nalunaarut allanngortinneqartussanngorpoq. Tamanna pissutigalugu Nuuk Imerup sodavandinik immiaaqqanillu maqitsinermut kisermaassinera unissaaq. Aatsaalli aappaagu.
Pissutsit maanna ataqatigiinngitsut, Pele Broberg Naleqqamit oqarpoq. Assi © : KNR
januaarip 20-at 2023 10:23

- Ammanerulersitserusukkaangatta tamatuma inuiaqatigiinnut iluaqutissaanissaata qulakkeernissaa aamma kissaatigisarparput. Pissutsit maanna ataqatigiinngillat.

Naleqqamit Pele Broberg puiaasat pillugit nalunaarut Inatsisartut novembarimi akuerisaat pillugu oqarpoq.

Nuuk Imeq nalunaaruteqareersorlu taama nalunaaruteqarpoq. Nuuk Imermi pisortap maqitsiviup ullui qaangiutingajalersut naliliivoq.

Puiaasat pillugit nalunaarummi allannguineq Nuuk Imerup sodavandinik immiaaqqanillu maqitsisarnermut kisermaassinerminik annaasaqarnissaanik isumaqarmat taanna taama naliliivoq.

lnatsisartut aalajangiiffigisassaattut siunnersuut:

"Utertinneqarsinnaasutut Naalakkersuisunit akuerineqarsimappata immiaaqqat sodavandinillu qillertuusanik, plastikkinik igalaaminernillu puullit, ilusaat angissusaallu apeqqutaatinnagit, nunatsinni tamani tunineqarsinnaatinnerisigut Nuuk Imiup kisermaassinerata atorunnaarsinneqarnissaa siunertaralugu immiaaqqat imeruersaatillu kulsyrinik akullit puui pillugit malittarisassanik nutaanik kingusinnerpaamik 1. januar 2024-mi aalajangersaanissamik Naalakkersut peqquneqassasut".

Puiaasat pillugit nalunaarut nutaaq nunami allamiut suliffeqarfiisa Nuuk Imermut unammillersinnaalernissaannik aamma isumaqarpoq, kalaallit taamaalillutik nioqqutissanik Nuuk Imermeersuinnaanngitsunik pisisinnaalissapput. Taanna aappaagu januaarip aallaqqaataani kingusinnerpaamik atuutilissaaq.

AAMMA ATUARUK Nuuk Imermi pisortaq: Nuuk imeq matorataannaavoq

Utertitseriaaseq nutaaq aamma atuutilissaaq.

Kisermaassineq unitsivikkusukkaa

Naleqqalli Nuuk Imerup kisermaassinera piaartumik unitsikkusuppaa. Tamannalu ukiortaamit atuutilereernissaa kissaatigigaluarpaa. Puiaasallu pisiarfiit utertitsisarfiini naammagukkunnaartut suneqassanersut kingusinnerusukkut aalajangiiffigineqarumaartut partii isumaqarpoq. Dansk Returpantitulli utertitassat tamarmik atorsinnaasariaqanngilaat.

AAMMA ATUARUK Nuuk Imermi siulittaasoq: Tunniutiinnanngilagut

Tamannali niuernermut killeqanngitsumut killiliissasoq, Naleraq isumaqarpoq, nunarpummi nunanit allanit Danmarkiunngitsumit immiaaqqanik sodavandinillu eqqussuisinnaassannginnerannik tamanna kinguneqassaaq.

Taamaammat Inatsisartut puisaat pillugit nalunaarummik novembarimi taasimmata Naleraq akuersinngilaq.

- Tamannali qanoq ataqatigiissitsiniarnerannik suli paasisaqarsimannginnerannik takutitsivoq, Pele Broberg oqarpoq.

Demokraatit: Nuuk Imeq pitsaanerusumik iliuuseqartariaqarpoq

Puiaasat pillugu nalunaarutip allanngortinneqarnissaa utertitsisarnermullu nutaamik aaqqiissummik atulersitsisoqarnissaa Demokraatit siorna aggustimi siunnersuutigaat.

Nuuk Imerullu unammillersinnaalluarnissani nammineq akisussaaffigigaa Demokraatit siulittaasuata tullia Nivi Olsen isumaqarpoq.

- Nuuk Imeq matunissamut aarlerinartorsiornera pissutigalugu kisermaassisussaatissinnaanngilarput, taanna oqarpoq.

AAMMA ATUARUK Demokraatit: Nuuk Imeq unammillerteqarnissamut annilaangaguni pitsaanerusumik iliuuseqartariaqarpoq

- Unammillertoqarnissaa pingaaruteqarlunilu peqqinnartuusoq isumaqarpunga. Nuuk Imeq unammillerteqarnissamut annilaangaguni pitsaanerusumik iliuuseqartariaqarpoq.

Nuuk Imeq 50-inik sulisoqarpoq, suliffeqarfillu matuinnassaguni sulisut atorfitsit aamma annaassavaat.

Puiaasanut inatsit nutaap utertitseriaatsillu qaqugu atuutilernissaannut suli ulluliisoqanngilaq.