Pisiartut Nuuk Imerup siunissaa aalajangissagaat, Demokraatit siulittaasuata tullia Nivi Olsen isumaqarpoq.Assi: KNR / Malik Brøns

Demokraatit: Nuuk Imeq unammillerteqarnissamut annilaangaguni pitsaanerusumik iliuuseqartariaqarpoq

Nuuk Imiup puukunut inatsit nutaaq pillugu unammillerneqarluni matusariaqalernissani annilaangagaa, killeqanngitsumilli niuersinnaanermi tamanna aarlerinartuusarpoq, Demokraatit siulittaasuata tullersortaa oqarpoq.

Puiaasat pillugit inatsisip allanngortinnera pissutigalugu Nuuk Imeq nunatsinni sodavandinik immiaaqqanillu maqitsinermut kisermaassisoq matunissamut aarlerinartorsiulissaaq. Tamanna Nuuk Imermi pisortap, Bernhard Christensenip suliffeqarfiullu siulersuisuisa siulittaasauta, Kuupik Kleistip ernumassutigaat.

Suliffeqarfimmili tamanna aarlerinartuusartoq, Demokraatit siulittaasuata tullia, Nivi Olsen isumaqarpoq.

- Nuuk Imeq matunissamut aarlerinartorsiornera pissutigalugu kisermaassisussaatissinnaanngilarput.

Puiaasat pillugu nalunaarutip allanngortinneqarnissaa utertitsisarnermullu nutaamik aaqqiissummik atulersitsisoqarnissaa Demokraatit 2022-mi aggustimi aalajangiiffigisassatut siunnersuutigaat.

Aalajangiineq Inatsisartuni 2022-mi novembarimi akuerineqarpoq.

Tamannalu pissutigalugu nunami allamiut suliffeqarfii Nuuk Imermut unammillersinnaalerput, kalaallillu Nuuk Imermi pisiassanik allaanerusunik pisisinnaanngussallutik.

Matoratarsinnaasoq

Nuuk Imermi pisortap, Bernhard Christensenip oqarnera naapertorlugu siunissaq qularnarpoq. Puiaasammi pillugit inatsit nutaaq pissutigalugu Nuuk Imerup unammilligassaa annertuallaarpoq, suliffeqarfiullu taamaalilluni matoratarsinnaalluni.

- Maqitassatta annertussusaat appassapput, maqitsivippullu angisoorujussuulluni, taamaammat ataqatigiinngillat. Maqitat tunisassiallu ataqatigiinnavianngillat, Bernhard Christensen oqarpoq.

Nivi Olsenilli siunissaq pillugu oqareernissaq siusippallaarsoraa.

- Isumaqarpunga Nuuk Imerup nioqqutissanik allanik tuniniaasoqalerpat nioqqutissiorsinnaanissami akilersinnaannginnissaanik eqqarsalereernera kukkunerusoq. Unammillertoqarnissaa pingaaruteqarlunilu peqqinnartuusoq isumaqarpunga. Nuuk Imeq unammillerteqarnissamut annilaangaguni pitsaanerusumik iliuuseqartariaqarpoq.

Nuuk Imeq 50-inik sulisoqarpoq, suliffeqarfillu matuinnassaguni sulisut atorfitsit aamma annaassavaat.

Tamannali ajornartorsiutaanngitsoq, Nivi Olsen oqarpoq.

- Nunatsinni sumiiffinni tamani sulisussanik pisariaqartitsivugut. Nuuk Imermi sulisorpassuit pikkorissuullutillu aalaakkaasuusut nalunngilara, taamaammat Nuuk Imerup matunialikkersaarnissaa sulisuisalu suliffissaarunnissaannik oqarneq siusippallaarsoraara.

Nunatsinnut pitsaasoq

Nivi Olsenip oqarnera naapertorlugu nioqquteqarnerup killeqanngitsuunissaa nunatsinnilu immiaaqqat sodavandillu qillertuusaniittut, plastikkiniittut igalaaminerniittullu angissusaat apeqqutaatinnagu tuniniarneqarsinnaanissaat innuttaasut iluaqutigisussaavaat.

- Nuuk Imerup kisermaassinera pissutigalugu uagut atuisartut innuttaasullu pisiniarfinni nioqqutissat akornanni qinigassaqarpallaarneq ajorpugut, Nivi Olsen oqarpoq.

Puiaasanut inatsit nutaaq puiaasanillu utertitseriaaseq qanorpiaq ilissanersut suli ilisimanngilarput.

Nuuk Imerup inatsit imminut iluaqutissaminnut sunniuteqartinniarallassavaa. Demokraatit Nuuk Imermut tusarnaarnissaminnut ammapput, Nivi Olsenilli Inatsisartut suliffeqarfiit sorliit sunik kisermaassisinnaanerannik aalajangiisinnaassasorinngilai.

- Pisisartut aalajangissavaa. Innuttaasut sunik piserusunnerlutik sunalu akilersinnaanersoq aalajangissavaat, Nivi Olsen oqarpoq.

Puiaasanut inatsit nutaap utertitseriaatsillu qaqugu atuutilernissaannut suli ulluliisoqanngilaq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl