Nakorsat peqatigiiffiat: Nakorsiartarfiit namminersortut inuiaqatigiinnut iluaqutaanavianngillat

Oqarasuaatikkut utaqqisorpassuit, nakorsiarnissamut piffissap sivikinnerunera peqqinnissamillu suliaqartut akornanni sulisut nikerangaatsiarnerat.

Ilungersunartut taakku nunatsinni amerlanerpaat tamat peqqinnissaqarfianut attaveqarsimasut nalaassimavaat.

Taamaammat nunatsinni namminersortunik nakorsiartarfeqalernissaanut periarfissaq qinikkat arlallit ajornartorsiutaasumut aaqqiissutaasinnaasutut periarfissatsialattut isigaat.

Nunatsinnili Nakorsat Peqatigiiffiannit qularnerusoqarpoq.

Nakorsammi peqatigiiffiata oqallinneq soqutiginartuusorigaluarlugu nunatsinni namminersortunik nakorsiartarfinnik pilersitsisoqassappat tamanna napparsimasunut naligiinnginnerulersitsoqarsinnaasoralugulu aningaasartuuteqarfiunerulissasoraa.

Nunatsinni Nakorsat Peqatigiiffianni siulersuisut, KNR-ip apeqqutaanut allakkatigut akissumminni allapput.

- Sammisap oqaluuserineqarnera tunngaviusumik pitsaasuusoraarput, kisianni nunatsinni peqqinnissaqarfimmi uagut ilisimasagut tunngavigalugit tamatuma inuiaqatigiinnut ataatsimut iluaquteqarsinnaanissaa takorlooruminaatsipparput, taakku allapput.

Nakorsianik passussinerit imaluunniit misissuinerit ilaat nakorsamit namminersortumit suliarineqartartussanngussappata tamanna peqqinnissaqarfiup suleriaasianik annertuumik allannguisariaqarfiunissaa ilaatigut pissutaavoq.

- Qitiusumik napparsimmaviiit peqqissaaviillu napparsimasunik unitsitsillutik suliaqaqatigiissinnaanerat sumiiffinnilu taakkunani kingornatigut nakorsaasinnaanerat iluaquteqangaatsiarpoq. Tamanna napparsimasut pitsaasumik nakorsarneqarnissaannut qulakkeereqataavoq.

Nakorsiat sumiiffimmi ataatsimi misissorneqarsinnaanerat, unitsinneqarnissaanerat passunneqarsinnaanerallu nakorsartinnermut tamarmut iluaqutaalluartoq, Nunatsinni Nakorsat Peqatigiiffiat isumaqarpoq. Assi © : KNR / Malik Brøns

Tamatuma saniatigut aningaasaqarnermik ataqatigiissitsiniarnermut ajornakusoortitsissasoq, nakorsat peqatigiiffiat isumaqarpoq.

Taakkumi assersuutigalugu nakorsiartarfinni namminersortuni ilisimaneqartutulli nakorsianik nakorsartinnermi tamaanik nammineq akiliisinnaallutillu akileerusuttut amerlassusaat naammanngitsut isumaqarput.

- Nunatsinni nakorsat namminersortut akiliisartunik sullitassaqarsorinnginnatsigit, taama sullissineq Danmarkimi nakorsanik namminersortoqarneranisulli maani taama ittut inuiaqatigiinnit akilerneqartartussaassapput. Aningaasalersornissaa isumaliuutigisassaassaaq, aningaasammi allaniit tigusariaqassapput, taamaaliorneq allanut aamma kalluaassasoq, taakkua allapput.

Nakorsassaaleqinermut iluaqutaanavianngitsoq

Nakorsat namminersortut nakorsassaaleqinerujussuarmut, peqqinnissaqarfimmut ukiorpassuarni ajornartorsiutaasumut, aaqqiissutaasinnaasoq qinikkat arlallit politikkikkut oqallinnermi oqaatigaat.

Nunatsinnili Nakorsat Peqatigiiffiat tassungattaaq isumaqataanngillat.

Nakorsiartarfiimmi namminersortut nakorsanik tamat peqqinnissaqarfiinit sulisussaaleqinermik ilungersuuteqareersumit tigooraaratarsinnaapput.

- Nunatsinni peqqinnissamik ilinniarsimasunik sulisussarsiorneq sulisunillu attassiniarneq ilungersunangaatsiareerpoq, nakorsanillu namminersortunik pilersitsisoqassappat tamanna Nuummi peqqinnissaqarfimmi aamma illoqarfinni qitiusumik napparsimmaveqarfinni imaluunniit peqqissaavinni nakorsaqarniarnermut sunniuteqangaatsiassagunarpoq, nakorsat peqatigiiffiat allappoq.

Nunatsinni Nakorsat Peqatigiiffiata nakorsiartarfiit namminersortut nakorsanik peqqinnissamillu suliaqartunik assersuutigalugu Dronning Ingridip Napparsimmavissuanit tigooraasinnaanissaat ernumassutigaa. Assi © : KNR / Malik Brøns

Tamatuma saniatigut peqqinnissaqarfimmi nakorsat atorfeqareersut suliinnartissinnaanissaat kisimi ajornakusuussanngilaq, aamma peqqinnissamik suliaqartut allat amigaataanerulersinnaapput, nakorsat peqatigiiffiat allappoq.

- Nalinginnaasumik nakorsaanermi nakorsaannaanngitsumik sulisoqartariaqarpoq. Oqalutseqassaq, nakorsiartarfimmi sulisoqassaaq, misissuiffimmilu sulisoqassalluni, taakununngalu napparsimmavimmit sulisunit soqutiginnittoqarsinnaavoq, aningaasartuuteqarfiungaatsiarlunilu.

Nakorsiat ilaminiinnaanut iluaqutissartaqartoq

Nakorsat peqatigiiffiata nunatsinni sumiiffinni amerlanerpaani tamat peqqinnissaqarfiinut namminersortunullu nakorsiartussat amerlannginnerat pissutigalugu nakorsiartarfinnik namminersortunik peqarnissaa isumassaqanngitsoq, nakorsat peqatigiiffiata ilanngullugu erseqqissaatigaa.

- Nuummi nalinginnaasumik nakorsiartitsisarnermik aamma napparsimaviit suleqatigiinnerannik allannguingaatsiarluta aaqqissuusseqqinneq immaqa iluatsissinnaavoq. Tamannali inuiaqatigiit aningaasaqarneranut akisungaatsiarnissaa ernumassutigaarput, taakku allapput.

Nakorsiartarfinnik namminersortunik aningaasarissaartumik qinikkat suliaqarlutik iluatsitsisinnaassagunik tamanna nakorsiat ilamininnguinut iluaqutaasinnaavoq.

- Nakorsianut nakorsamik namminersortumik aalaakkaanerusumik ammasarfeqarsinnaasumik nakorsiamillu ilisarisimannittumik nakorsaqalernissamik aalajangiinissamut periarfissaqartumininnguanut iluaqutaasinnaavoq. Ataavarnerunissamut periarfissiissaaq.

- Tamanna inunnut ataasiakkaanut kissaatigisaminnik suliffeqarnissaannut atatillugu aalajangiisinnaanerutitsisinnaavoq, nakorsiartartullu ilamininnguisa nakorsamik toqqaanissaannut periarfissaqarnerutitsilluni. Tamannali aningaasartuuteqarfiussaaq.

Nunatsinnili Nakorsat Peqatigiiffiata nakorsiartut ilaminiinnai nakorsamut namminersortumut nakorsiarsinnaagunik tamanna inuiaqatigiinni naligiinnginnerulersitsissasoq erseqqissaatigaa.