Politikkikkut aalajangiinerit ajornakusoortut namminersortunik nakorsiartarfittaarsinnaaneq aqqutissiuutissavaat
Nakorsat namminersortutut nunatsinni nakorsiartarfittaarsinnaanerpat?
Taamaappat, nunarput taava nakorsassaalatsiunnaassanerpa?
Aamma tamatuminnga piviusunngortitsinissaq kikkunnit aningaasalersorneqassava?
Tassa nakorsat nunatsinni nammineq nakorsiartarfittaarsinnaanerannik oqallisigineqaleruttorneranni apeqqutit ilarpassui akineqarsinnaanngimmata apeqqutissaqarneruleriaannarpoq.
Nakorsalli tassa taamaaliorsinnaanissaannik misissuinissaq politikerertatta ilaannit tapersersorneqarpoq.
Nakorsammi taamaaliorsinnaanissaannik inatsisiliortoqassasoq, Inatsisartuni ilaasortap Doris Jensenip (S) upernaaq manna ataatsimiinnerminni siunnersuutigaa.
Siunnersuutaalu partiinit allanit iluarisimaarneqarpoq.
Nakorsalli inatsisitigut ajornaquteqanngitsumik nunatsinni nammineq nakorsiartarfittaarsinnaasut, nunatta nakorsaanera Henrik L. Hansen oqarpoq.
- Peqqinnissamik suliallit inatsisitigut ajornaquteqanngitsumik nammineq nakorsiartarfittaarsinnaapput. Namminersortunimmi nunatsinni ukiorpassuarni soorlu kigutinut nakorsiartarfeqarpoq, pillorissartarfeqarpoq assigisaallu. Nakorsat nammineq aamma nakorsiartarfittaarsinnaapput.
Nakorsallumi taamaaliorsinnaasut, peqqissutsimut naalakkersuisup Agathe Fontainip Inatsisartut ataatsimiittarfianni oqallinnermi aamma erseqqisaatigaa.
Allatigut akimmiffiusinnaasoqaqisoq
Namminersortunillu nakorsiartarfittaarsinnaaneq inatsisitigut ajornaquteqanngikkaluartoq allatigut akimmiffiusinnaasorpassuit taamaaliorsinnaanermik ajornakusoortitsipputit.
Assersuutigalugumi namminersortunik nakorsiartarfeqalerpat, taakkua nakorsaasiisinnaanissaannik, qinnguartaatitsisinnaanissaannik nakorsiaminnulluunniit tunngasunik paasissutissarsisinnaanissaannik pisortanut isumaqatigiissusiortoqarnikuunngilaq allamilluunniit aaqqiissuteqartoqarnikuunani.
- Nakorsarmi namminersortoq nappaammik eqqugaasunut nakorsaasiisinnaasariaqarpoq. Imaluunniit qinnguartaaqqusisinnaasariaqarpoq, aaviisitseqqusinnaasariaqarpoq allatulluunniit peqqusisinnaasariaqarpoq. Peqqinnissaqarfimmilu sulisut kisimik massakkut taamaaliorsinnaapput, nunatta nakorsaanera Henrik L. Hansen oqarpoq.
- Tassa nakorsaq arlaannaalluunniit nammineq piminik qinnguartaateqartariaqarpoq imaluunniit qinnguartaaqqusisinnaasinnaasariaqarpoq allatulluunniiit misissueqqusisinnaasariaqarpoq.
Taamaaliorsinnaalertinnagilli politikkikkut pingaarnersiulluni nalilersueqqissaaqqaarnissaq pisariaqartoq, taanna erseqqissaavoq.
- Narkorsarmi Peqqinnissaqarfimmeersuunngitsoq qinnguartaaqqusisinnaanngorpat, nakorsiani sorliit salliunneqassanersut qularnanngitsumik oqallisaalissaaq. Tassa Peqqinnissaqarfimmut nakorsiat nakorsiartarfinnulluunniit namminersortunut nakorsiat salliunneqassanersut. Tamanna aaqqiissuteqarnissamut qularnaagassat ilaattut assersuutissaqqippoq.
Kikkunnit aningaasalersorneqassava?
Aningaasalli tamatuma oqallisaanerani apeqqutissaqarneruleriaannarnermut pissutaalluinnartunut aamma ilaapput. Namminersortumummi nakorsiarneq kikkunnit akilerneqartassava?
Politikerertatta tamanna aalajangigassarigaat, nunatta nakorsaanera Henrik L. Hansen oqarpoq.
- Pisortat nakorsialluunniit namminneq akiliisassanersut eqqarsaatigeqqissaaqqaartariaqarpoq. Kigutinummi namminersortumut nakorsiarneq tamaat nammineq akilerneqartarpoq. Namminersortumut nakorsiarnermi allatut aaqqiisoqassava?
Namminersortumullu nakorsiarneq tamaat ilaannaaluuniit nammineq akilernissaanik aaqqiisoqassappat, tamanna inuit peqqinnissakkut assigiinngisinneqalernerannik qularnanngitsumik kinguneqartussaassaaq.
Nunatta inuisa peqqissusiannik ilisimatooq Danmarkimi Statens Institut for folkesundhedimeersoq, tassa Naalagaaffiup innuttaasut peqqissusaannik misissuisoqarfianeersoq Peter Bjerregaard taama oqarpoq.
- Taamatummi aaqqiisoqarpat, pissaqarnerit nakorsiarnissamut periarfissaqarnerulissapput. Akissakinnerilli akissaalatsissassallutik.
Pisortalli nakorsanut namminersortunut tapiissuteqartarnissaat politikerit aalajangissappassuk, Peqqinnissaqarfiup aningaasalersorneqarnermigut eqqorneqaatigerataannaagaa, Peter Bjerregaard aamma isumaqarpoq.
Nunatta nakorsassaalatsiunnaaneranik kinguneqarnissaa qularnartoq
Namminersortunik nunatsinni nakorsiartarfittaarsinnaanngortoqassappat, tamanna Peqqinnissaqarfiup ukiorpassuarni nakorsassaalatsinerata qaangernissaanut aaqqiissutaasinnaasutut, politikerertatta arlallit oqallinnermi oqaatigisarpaat.
Ilisimatoorli Peter Bjerregaard isumaqataanngilaq.
Namminersortunimmi nunatsinni nakorsiartarfeqalissappat, tamanna Peqqinnissaqarfiup taakkualu sulisoqarniarnikkut arsaannerannik kinguneqartussaassasoq, taanna isumaqarpoq.
- Nakorsiartarfimmimi namminersortumi nakorsarpaanik allanik suleqateqarluni nakorsatut sulineq Peqqinnissaqarfimmilu (Dronning Ingridip Peqqissaavia, aaqq.)) nakorsatut sulineq tunngaviatigut assigiipput.
- Taamaammat namminersortunik nakorsiartarfittaarsinnaanngortitsiniarneq nakorsanillu amerlanernik nakorsiartarfimmi atorfinitsitsinerminngarnit sooq pitsaanerussaaneraasoqarnersoq paasisinnaanngilara, taanna oqarpoq.
Namminersortunimmi nakorsiartarfeqalissappat, taakkua Peqqinnissaqarfillu nakorsanik amigaataaqisunik arsaatilerataannaapput.
- Nammineq nakorsiartarfittaassani sulerusuttorpassuaqassappat, taakkua peqqinnissaqarfimmi nakorsat taakkunani akissaatigissaarnerusartuusuni suliffikkuminarnerukkajuttuusunilu sulinissartik soorunami orniginartinnerusussaassavaat.
Namminersortunik nakorsiartarfittaarsinnaanerup pitsaaqutaanik ajoqutaanillu qulaajaasoqassasoq, naalakkersuisut peqqissutsimik isumaqatigiissut ukiaq saqqummiummassuk aalajangerput. Qulaajaanerlu Inatsisartut 2025-mi upernaakkut ataatsimiilertinnagit naammassineqassasoq, naalakkersuisut siunnersuutigaat.
