Meerarpassuit misiliinermi akiuussusersorneqartut
“Aluu, sianerpunga pissutigalugu meeqqat mæslinginut, savarnernut aniornernullu akiuussuserneqarsimanngitsoq takusinnaagakku. Eqqaamallugu ulluinnaat tamaasa peqqinnissaqarfiliarsinnaagavit meeqqallu akiuussusertillugu.”
Angajoqqaat Nuummiittut hunnorujunit ikinnerunngitsut meeqqamik akiuussutissamik MFR1-imik kapitinneqannginnerat eqqaasitsissutigalugu peqqinnissaqarfimmiit sianerfigineqartut taamatukanneq oqarfigineqartarput. Meeqqat tassannga akiuussuserneqarsimasut mæslingernermut siooragineqartumut ilaatigut akiuussuserneqartarput.
Meerarpassuit sooq akiuussuserneqarsimannginneri paasiniarlugu oqartussat misiliillutik iliuuseqarput, tassa ilaqutariit meerartallit ulluinnarni ulapittut sianerfigalugit eqqaasinneqarpata akiuussuserneqartartut amerlanerulersinnaanersut paasiniarneqarluni.
Sianertarnerillu iluaqutaasimasut nunap immikkoortuani Sermersuumi nakorsat pisortaata Jesper Olesenip qularutiginngilaa.
- Angajoqqaat sianerfigisatta pingajorarterutipajaavisa sianerfigineqareernerminni meeqqatik akiuussusertikkiartortaraat takusinnaavarput. Angajoqqaanik meeqqamik akiuussuserneqarnissaannik qujaannartunik naammattuugaqanngilagut. Puigorneqartartorli aamma akiuussuserneqarnissamik neqeroorut ilisimaneq ajoraat maluginiarparput, nunap immikkoortuani nakorsat pisortaat oqarpoq.
Meeqqat ikittuinnaat akiuussuserneqartarnerat aarlerinartoq
Meeqqat nuna tamakkerlugu akiuussuserneqartartut ikippaallaartut KNR-ip siusinnerusukkut allaaseraa.
Akiuussuserneqartartut ikippallaarneri nunatsinni nappaalanernik tuniluutilertortoqarsinnaanerinik kinguneqarsinnaasoq nakorsaaneq Henrik L. Hansen taamani oqarpoq. Taamaattoqassappallu innuttaasunut pingaartumik meeqqanut kinguneqarnerlussinnaavoq.
- Nukillaarneq mæslingernerlu tuniluutiasuararsuupput. Ulorianartutut isigineqannginnerat puigorneqarsimaneranik peqquteqarpoq. Kisianni suli atugaappput. Maani tuniluutilersinnaanera ilimanaateqarpoq, nakorsaaneq 2022-mi oqarpoq.
Nukillaarnermut mæslingemullu akiuussuserneqartartut amerlassusaat qiviaraanni aarlerinartoqarpoq. Tamanna meeqqat akiuussusersorneqarnerat pillugu ukiumoortumik nalunaarusiami juuli 2023-meersumi takuneqarsinnaavoq.
| Akiuussutissaq |
Anguniagaq |
Akiuussuserneqarsimasut |
|
Meeqqat ilaatigut poliomut pingajussaanik akiuussuserneqarsimasut amerlassusaat |
90 procentit | 76 procentit |
|
Meeqqat ilaatigut mæslinginut aappassaanik akiuussuserneqarsimasut amerlassusaat |
95 procentit | 65 procentit |
Sianerneq pissutigalugu nakorsiat allat piffissaqarfigineqanngitsut
Angajoqqaat eqqaasinneqarlutik sianerfigineqareernerminni meeqqaminnik akiussusertitsiartortartut amerlagaluartut taamaaliortoqaannarnissaa ilimagineqassanngilaq. Peqqinnissaqarfimmimi sulisut killeqarmata pingaarnersiuiuaannartoqartariaqarpoq, angajoqqaanullu sianertarneq aningaasanik atorluaanerunngitsoq Jesper Olesen isumaqarpoq.
- Meeqqatta akiuussuserneqartarnissaat pingaaruteqaqaaq. Sianertarnermilli misiliineq sulerulutsitsivoq, ataasiarlunimi akiuussusiineq inuup ataatsip sulisinneranik naleqarpoq.
Ingasappallaarpa?
- Ingasappallaarujussuarpoq. Nakorsiaq nalinginnaasumik 15-20 minutsit piffissaqarfigineqartarpoq. Angajoqqaanulli sianerneq piffissartuutaagaangat suliassat allat piffissaqarfigineeruttarput, soorlu meeqqanik eksemertunik misissuinissaraluamut, Jesper Olesen oqarpoq.
Nunap immikkoortuani nakorsat pisortaat: Nalilersueqqittariaqarpugut
Nunap immikkoortuani Sermersuumi akiuussusersorneqartartut nunap sinneranut sanilliullugu ikinnerupput. Taamaattumik nunap immikkoortuani akiuussusersuinermut neqerooruteqarnermi periuseq ilumut ajunnginnersoq nalilersorneqartariaqartoq Jesper Olesen isumaqarpoq.
- Taama amerlatigisut akiuussuserneqartanngippata arlaatigut ajortoqarsimassaaq, nunap immikkoortuani nakorsat pisortaat oqarpoq.
Angajoqqaat meeqqamik akiuussuserneqarnissaat kissaatigigaangassuk sulinerup nalaani ulluinnarni nal. 14.30 -15.00 akornanni Dronning Ingridip Peqqissaavianukartitsisarneq pitsaanerpaasimassagunanngitsoq nakorsat pisortaata oqaatigaa.
- Piffissaq ilaqutariinnut meerartalinnut immaqa tulluarpallaanngilaq. Akiuussusersuineq qulakkeerniarlugu immaqa meeqqerivinnukartariaqartassaagut. Taamatulli aaqqiissuteqassagaanni aamma tamanik aaqqiinerunngilaq, Jesper Olesen oqarpoq.
Nunap immikkoortuani Sermersuumi akiuussuserneqartartut amerlanerulersinniarlugit suleriuseq qanoq allanngortinneqassanersoq suli aalajangertoqanngilaq.
Meeqqat akiuussuserneqarsimanngikkaangata eqqaasitsilluni angajoqqaanut sianertarnerup ingerlateqqikkallarnissaa akiuussusersuinermi aqutsisoqatigiit nalilersoqqaarallassavaat.
