Nakorsat aalajangersimasunik piginnaasallit atugaanerulernerat artukkiisoq
Aasianni ernisarfik ukiumi ataatsimi matugallarneqartussanngortoq KNR-imit ataasinngormat saqqummiupparput.
Tamanna ernisarfimmi sulisussanik piumasaqaatinik pisortatigoortunik naammassinnissinnaasunik pissarsisoqarsinnaannginneranik pissuteqarpoq.
Tamannalu siunissami ajornarneruleriartornerusinnaavoq, nakorsammi peqqinnissaanermillu suliaqartut allat, pingaartumik Danmarkimeersut Skandinaviameersullu tikisinnissaat nunatsinnimi peqqinnissaqarfiup suli pisariaqartimmagu.
Peqqinnissaqarfiulli ineriartorfiunera nunatsinni, assersuutigalugulu Danmarkimi, assigiinngitsumik maanna ingerlaveqartoq, peqqinnissamut aqutsisoqarfimmi nakorsat qullersaata, Berit Bjerre Handbergip oqaatigaa.
AAMMA ATUARUK Ernisussiortut peqatigiiffiata Aasiaat ernisarfiujunnaavissinaanera ernumanarteqaat
- Danmarkimi napparsimmaviit ikilisarneqarlutik anginerungaatsiartunik taarsersorneqarnerat, piginnaasaqarfinnillu eqiteriffigineqarnerat unammillernartuuvoq. Nakorsanut peqqissaasunullu atuuppoq, tamannalu nunatsinni aaqqissuussaanermut naleqqukkunnaariartuinnarluni. Peqqinnissaqarfimmi sulisut Danmarkimi pisariaqartinneqartunit siammasinnerungaatsiartumik piginnaasallit maani pisariaqartippagut, Berit Bjerre Handberg KNR-imut oqarpoq.
Maannakkut aaqqiissuteqarfiginissaa ajornakusoortoq
Ajornartorsiut ernisussiortut peqatigiiffiannit ilisimaneqarpoq, peqatigiiffiummi nunatsinni ernisarfinni nakorsassarsinissap ajornartorsiutaanera ilisimalluarmagu:
- Nakorsatut nalinginnaasumik piginnaasalittut sulileraanni, immaqalu sivisuumik pilaalluni ernisulerinikuunani taamaliortussanngoriataaraanni, tamanna soorunami annilaarnalaarsinnaavoq, ernisussiortoq Anne Schurmann, ernisussiortut peqatigiiffiat sinnerlugu taama nassuiaavoq.
Nakorsat qullersaata ajornartorsiut aaqqiissuteqarfiginiarnerarpaa, imaaliallaannarluguli aaqqiissutissarsisoqarsinnaannginnerarlugu:
- Piginnaasanik ineriartortitsinissamut assigiinngitsunik neqerooruteqartarpugut. Suliassap naammassinissaanut nakorsat ataasiakkaat piginnaasaat nalilersuiffigisarpagut, sutigullu piginnaanngorsaqqissinnaanerat imaluunniit taakkuninnga ikiuisinnaasumik sulisoqarnerluta misissortarlutigu. Suliassaq imaannaanngitsorujussuuvoq, Berit Bjerre Handberg oqarpoq.