Doris: Nakorsassaaleqineq erngertumik aaqqiivigineqarsinnaanngilaq
Aaqqiissuutissalli erngertumik aaqqiivigineqarsinnaanngillat, Peqqissutsimut Ilisimatusarnermullu Naalakkersuisoq oqarpoq.
Peqqinnissaqarfimmi Diskomi nakorsaaneq aalajangersimasumik atorfeqartutuaasoq novembarip aallaqqaataani soraarninngorluni aallartussaavoq, tamannalu Qeqertalimmi kommunalbestyrelsimi ilaasortap Kristian Jeremiassenip akuersaarsinnaanngilaa.
- Illoqarfimmiunut nunaqarfimmiunut, pitsaanngitsorujussuarmik sunniuteqartussaavoq, Kommune Qeqertalimmilu innutaasunut maannakkut sunniuteqalereerpoq, Kristian Jeremiassen taama oqarpoq.
Kommunalbestyrelsimi ilaasortaq isumaqarpoq, peqqissutsimut naalakkersuisoq Doris J. Jensen ajornartorsiut pillugu iliuuseqartariaqartoq, peqqinissaqarfiup siunissami ajunngitsumik ingerlanissaanik qulakkeerinnilluni.
AAMMA ATUARUK Qeqertarsuup Tunuani aalajangersimasumik novembarimit nakorsaqarunnaassaaq
Aningaasatigut allatigullu atugassaritinneqartut, qanoq aaqqinneqarsinnaanerat, Naalakkersuisut sinaakkusiillutik qulakkeertariaqarpaat, taava taamaaliornikkut Kommune Qeqertalimmi innuttaasut toqqissillutik piniassammata, Kommune Qeqertalimmi kommunalbestyrelsimi ilaasortaq Kristian Jeremiassen oqarpoq.
Peqqissutsimulli naalakkersuisup ajornartorsiutip piaartumik aaqqiivigineqarnissaa qulakkeersinnaanngilaa
Peqqissutsimut Naalakkersuisoq Doris J. Jensen taama oqarpoq.
- Nunarput tamakkerlugu nakorsassaaleqineq annertoorujussuuvoq, Kalaalllit Nunaanni nakorsat aalajangersimasumik atorfeqartut 100 procentiusussaagaluarlutik 50 procentit ataallugit atorfeqarput, Peqqissutsimut Naalakkersuisoq Doris J. Jensen oqarpoq.
AAMMA ATUARUK Nakorsassaaleqineq ernumassutigineqartoq
Nakorsanik peqqissaasunillu peqqinnissaqarfimmi atorfinissinnaasunik ujartuisartussanik Peqqissutsimut naalakkersuisoqarfik Danmarkimi immikkoortortaqarfiliorniarpoq.
- Peqqinnissaqarfimmi atorfinittussanik ujarlertartussamik Danmarkimi pilersitsilerpugut, iliuusissanik annertusaasoqartariaqarmat, Doris J. Jensen oqarpoq.
Nakorsanik aalajangersimasunik atorfeqartussanik pissarsiniarnerup ajornartorsiutaanera ingerlaannaq aaqqivigineqarsinnaanngilaq:
- Peqqinnissamut aqutsisoqarfimmik ataatsimeeqateqarninni oqaluttuunneqarpunga nakorsassaaleqilluni ajornartorsiuteqarnerup ukiumik ataatsimik sivisussuseqarnissaa naatsorsuutigineqartoq, Doris J. Jensen oqarpoq.
