Nakorsaaneq: Omikron Nunatsinnut pisimasoq tunillatsittut takutippaat

- Allannguut nutaaq Omikron Kalaallit Nunaannut tikiussimasoq pissutsit naapertorlugit qularinngilarput.

Nakorsaaneq Henrik L. Hansen marlunngornermi KNR-imut oqarpoq. 

Coronap allannguutaa taanna assut tuniluutijasoq maani suli paasineqanngikkaluarpoq. Maannakkulli tunillaassuuttut sukkangaarmata tamanna taassuma qularinngilaa: 

- Misissugassaatitta ilaat Danmark-imi misissugassanngorlugit nassiuppagut. Maannakkummi nappaatip sukkasuumik tunillaassuutilernerata ersarissumik takutippaa, maanna tuniluuttoq siornatigut takusariikkatsinnit sukkanerusumik tuniluuttoq, Henrik L. Hansen nassuiaavoq. 

AAMMA ATUARUK Coronamik tunillatsittut 114-it paasineqarput

Nakorsaaneqarfik ippassaq nalunaarpoq, juullikkunni tunillatsittut nutaat 114-iusut. Taakkua amerlanersaat decembarip 23-anni 26-annilu misissuinerni paasineqarsimallutik. 

Tunillatsissimasullu suli amerlanerunissaat qularnarani, taanna nalunaarpoq: 

- Ulluni kingullerni tunillatsittut malunnartumik amerleriarneri takusinnaavarput, maannakkullu Danmark-imi coronap tuniluunnera sukkaqimmat, Danmark-imut juullisioriarsimasut angerlakaalerpata maani aamma tunillaassuunnerata sukkatsinnissaa naatsorsuutigisariaqarparput, nakorsaaneq oqarpoq. 

Malinnaaniarneq ajornakusoorpoq

Taanna oqaluttuarpoq, tunillatsissimasut qanillattuisimasullu attaveqarfiginiarneri maannakkutut tunillaassuunnerani peqqinnissaqarfimmit malinnaaffigiuminaappoq. 

- Piffissami kingullermi nappaatip sukkasuumik tuniluunnera uagutsinnut assut unammillernarpoq. Minnerunngitsumik Nuummi. Tunillatsittullu ulluni tulliuttuni ikiliartulernissaat ilimanarani. Soorunami tunillatsissimasut oqarasuaatikkut nalunaarfigineqartarnerat ingerlatiinnassavarput, tunillatsissimasinnaasunillu misissuinitsinnut atatillugu qanginngoorisimasut aamma nalunaarfigineqartassapput. 

AAMMA ATUARUK Coronamut misissuiviup matoqqanera Nuummiut uggoraat

 Cornamut misissortissimalluni ullut arlallit akissutissarsinngikkaanni taava qanoq iliortariaqarpa?

- Taamaassappat taava arlaannik ajortoqarsimassaaq. Misissortissimagaannimi ullormi misissortiffimmi, kingusinnerpaamillu aqaguani, akissutisisoqartassaaq. Tamatumunnga ataatillugu pissutsit apeqqutaasinnaapput, soorlu avinngarusimasumi najugaqaraanni misissugassallu Nuummut nassiunneqaqqaartussaagaangata. Taamaakkaangat sivisunerusumik utaqqisoqartarsinnaassaaq, misissortiffimmili tamanna nalunaarutigineqartassaaq. 

Tuniluuttuassaaq 

Henrik L. Hansen-ip erseqqissaatigaa, maannakkut pissutsit sukkasuumik aallanngulersut, namminerlu kiisalu suleqatimi nukissatik sumut atussanerlugit pingaarnersiortariaqalerlugit. 

- Maannakkut pissutsit naapertorlugit aamma anguniarparput, coronap tunillaassuunnerata kinguneraanik inuiaqatigiinni innarliissutaasinnaasut killilersimaarnissaat. Taamatut iliornikkut peqqinnissaqarfiup artukkerneqarpallaarani ingerlasinnaanissaa kiisalu atuarfiit paaqqinnittarfiillu ammaannarsinnaanissaat, taanna oqarpoq nangillunilu: 

AAMMA ATUARUK Tunillatsittut rekortileeqqipput: Danmark-imi tunillatsissimasut 16.000-it sinnerpaat

-  Tunillaassuunnerup unitsinniarnissaa anguniagaajunnaarpoq. Tamanna qangali qaangiutereerpoq. Maanna ukiuunerani amerlavallaat ataatsikkut tunillatsinnissaat pinngitsoorniartariaqarparput, maannakkullu suliniutigisagut atorlugit tamanna angusinnaavarput. 

Nunatsinni tamani ulloq kingulleq 74-inik tunillatsittoqarsimavoq.

Nunatsinni tamani taamaalilluni tunillatsissimasut 375-it nalunaarsorneqarput. 

Covid-19-imik nappaatillit sisamat napparsimmavimmi uninngapput. Pinartumilli napparsimasoqarani.