Coronamik tunillatsittut 114-it paasineqarput

Nunarput tamakkerlugu covid-19-mik tunillatsittut 114-it paasineqarput.

Kisitsisit nakorsaaneqarfiup nittartagaani takuneqarsinaasut naapertorlugit decemberip ulluisa 23-annit 26-at ilanngullugu tunillatsittut nalunaarsorneqarput.

Nakorsaaneqarfimmit erseqqissaassutigineqarpoq, decemberip ulluisa 23-anni aamma 26-anni misissortittoqarmat.

Nuummi tunillatsittut 95-it paasineqarput. Taakkununnga ilaapput nunaqarfimmi Qeqertarsuatsiaanni tunillatsittut 14-it.

Taakkua saniatigut Qasiannguani tunillatsitut 11-it Ilulissani ataaseq, Qaqortumi marluk, Sisimiuni ataaseq, Aasiannit ataaseq, Tasiilamilu pingasut paasineqarput.

Tasiilami tunillatsittut, Islandimit Nuummiillu angalasunit tunillanneqarput, ilaqutariillu marluk tunillaneqartut nakorsaaneqarfimmit paasissutissiissutigineqarpoq.

Covid-19-mik tunillanneqarsimallutik napparsimmavinni uninngasut sisamaapput Peruluttoqanngitsorli nakorsaaneqarfiup nittartagaani taama allasimavoq.

Nakorsaaneqarfiup nittartagaani allassimasoq naapertorlugu, Nuummi covid-19-mik tunillatsittut amerlasoorujussuupput, piffissallu sivikitsup ingerlanerinnaani illoqarfinnut allanut siaruaatissasoq. 

-  Tunillatsittut ataatsikkut amerlasoorujussuunnginnissaat anguniagaavoq, tuniluunnerullu siaruatsaalineqarnissaanut maleruaqqusat naapertorlugit pisoqarnissaa nakosaaneqarfimmit kaammattuutigineqarpoq. 

290-it tunillatseqqapput

Kalaallit Nunaani tamarmi coronamik tunillatsittut maannakkut  290-upput, taakkualu kommuneni tallimani ima amerlatigipput.   

Avannaata kommuniani : 2

Kommune Qeqertalimmi: 35

Qeqqata kommuneani: 5

Kommuneqarfik Sermersuumi: 246

Kommune Kujallermi : 2