Tunillatsittut rekortileeqqipput: Danmark-imi tunillatsissimasut 16.000-it sinnerpaat
Danmark-imi coronavirusimik tunillatsissimasut ullup kingulliup ingerlanerani 16.164-it paasineqarput.
Ataasinngornermi kisitsisit Statens Serum Institut-imeersut (SSI) tamanna takutippaat.
Tunilaatsissimasut sapaatiummat 14.844-t nassaarineqarmata aatsaat taama amerlatigileraluartut, ulloq ataaseq qaangiutiinnartoq taakkunannga amerlanerit nassaarineqarput.
Ataasinngornermi tunillatsissimasut nassaarineqartut ilaat 639-t tunillatseqqittuupput.
PCR atorlugu misissortitttut 130.686-it akorngini taakkua nassaarineqarput. Taamaalillutik tunillatsissimasut misissortittut 12,4 procenteraat, tassalu kikkut tamarmik coronamik misissortissinnaalernerisa kingorna aatsaat taama amerlatigisut nassaarineqarlutik.
Tamatuma saniatigut napparsimmavinnut unerartut 29-nik amerleriarlutik 608-lerput. Uninngasut akorngini 70-it perulupput 46-llu anersaartuuserneqarnikuullutik.
AAMMA ATUARUK Juullimi mattusimasut: - Oqaasileruminaapporluunniit
Covid-19-imik toqquteqartut arfineq marlunnik amerleriarlutik katillutik 3217-iulerput.
Kisitsisit qaffasittut takkussuupput piffissami kingullermi virusi nutaaq omkron immikkut alaatsinaanneqareersorlu.
Ullumi Danmark-imi tunillatsissimasut amerlanerpaat omkronimik tunillatsissimapput.
Taanna nutaaq pissutigalugu naalakkersuisut assigiinngitsunik killilersuuteqalerput, kiisalu misissortissinnaasut akiuussutissamillu kapitissinnaasut amerlillugit.
Taassuma nutaap qanoq pissuseqarnera suli misissorneqarpoq.
SSI-ip nalunaarutaa naapertorlugu, taanna akiuussutissanit sunnerneqarsinnaanera annikinneruvoq tuniluutijanerugunarlunilu. Danmark-imi nunanilu allani arlalinni inuiaqatigiinni nualluutip tunillaassuunnerulernaranut taanna pissutaasoq paasineqarpoq.