Juullimi mattusimasut: - Oqaasileruminaapporluunniit

Coronavirusimik tunillatseqqasut angerlarsimaannartussaapput. Taamaammat kisimiilluni juullisiortoqartussaassaaq.
nunatsinni coronavirusertut juulli aqaguttoq 373-iupput. Taamaammat amerlasuut mattusimallutik juullisiussapput. Linda Ellingsgaard taakkununnga ilaavoq. Assi © : KNR
Allattoq Nauja Møller, Ivik Kristiansen
decembarip 24-at 2021 10:55

Nunatsinni 373-it coronavirusimik juulli aqaguttoq tunillatseqqammata, mattusimallutik juullisiortussat amerlapput. Anja Abelsen marlunnik ukiulimmik tunillanneqarsimasumik erneqartoq taakkununnga ilaavoq.

- Piareersaatikka unikaallassuataarput. Juullip aqagunnerani suliarisartakkakka unipput. Nukarliup ammagassai kisiisa poortornikuuakka. Taava uagutsinni angumeriniagassakka allat aaqqissuussassakka saassunnikuuakka, Anja Abelsen oqarpoq.

Nuummilu najugalik alla kisimiittoq, coronavirusimik aamma tunillanneqarsimavoq.

- Mobiiliga sianermat, coronamik nipituumik oqaqqaarlunga oqaluukkakku coronartunga paasitippaanga. Siullermik ataatannut sianerama illaqqaarpugut, juulliliivissoq tunillatseriasaarneq uppernannginnermik, Linda Ellingsgaard oqarpoq.

AAMMA ATUARUK Corona pillugu ullumikkut kisitsisit: Tunillatsissimasut nutaat 67-it

Juulli ilaquttat ilagalugit nalliussineqakkajuppoq, taamatullu aamma coronamik eqqugaallutik angerlarsimaannartitaasut pilersaaraluarput.

- Anaanaga juulliaqqami ullaakkut tamaanga ullaakkorsioriartortussaagaluarpoq. Taava nukaga aappaalu, anaanaga, anaanama marluliaqataa ernerallu nukkanni unnukkut nereqatigiissamaaraluarpugut, Anja Abelsen oqarpoq.

- Ilaquttat ilaat tikerarnikuupput. Killilimmik ataatsimoornissamik pilersaaruteqapajaarlunga. Aamma juullikkunni sulisussaagaluarpunga, Linda Ellingsgaard oqarpoq.

Kiserliornissaq ernumagigaa

Anja Abelsenip angajulliliaa siulliulluni novembarimi coronavirusermat mattusimaqqaarput. Ernera nukarleq marlunnik ukiulik maanna tunillanneqarmat, aneqqusaanatik juullisiortussanngornertik nanertisimassutigigaa ersarippoq.

- Allaavoq. Oqaasileruminnaapporluunniit. Oqaatigiuminaatsilaarpara, kisianni marluulluta tamaani juullerumaarpugut,Anja Abelsen oqarpoq.

Linda Ellingsgaard aamma kisimi ineeqqami juullip nalliuttuini aneqqusaanavianngilaq, kiserliornissanilu ernumagilaarpaa.

- Kiserliornassamaaqaaq. Kisianni qujanartumik mobiilit attaveqaannarput. Naamasaqannginnama nerisassanik eqqarsarpianngilanga. Ilaquttanninngaanniit pajutsissasunga ilimanarpoq. Kiserliornassamaaqaaq, Linda Ellingsgaard oqarpoq.

Kommuneqarfik Sermersuumi tunillatseqqasut decembarip ulluisa 23-anni 325-upput.

Aamma atuaruk