Corona pillugu ullumikkut kisitsisit: Tunillatsissimasut nutaat 67-it
![](/sites/default/files/styles/image_934x467/public/article_images/7v9a2877.jpg?itok=1RVRTouw)
Nunatsinni tunillatsissimasut ullup ataatsip kingulliup ingerlanerani 67-iupput: Sisimiuni ataaseq, Aasianni 15-it Nuummilu 51-it.
Nakorsaaneqarfik taama nalunaaruteqarpoq, Aasiannilu tunillatsissimasut "amerliartungaatsiartutut" taallugit.
Nunatsinni tunillatsissimasut katillugit maanna 373-iupput.
Kastrupimit Kangerlussuarmut GL779-imut ilaasunit sisamat tunillatsissimasut paasineqarput.
Taakku Nuummi misissortinnerminni tunillatsissimasut paasineqarput, tamarmillu ersiuteqarlutik, Nakorsaaneqarfik paasissutissiivoq.
Ungaluusamiinnissamik kaammattuuteqartut
Kangerlussuarmit timmisartut GL551 aamma GL227 tunillatsissimasunik aamma ilaasoqarsimapput. Tunillatsissimasoq alla Nuummiittoq Kastrupimit Kangerlussuarmut decembarip ulluisa 18-iani angalasoq Kangerlussuarmiit Nuummut GL1643-mut aamma ilaalluni.
- Tunillatsissimasut uku paasineqartut angalnerminni tunillatsissimanissaannut takussutissaqarluarpoq, aamma naak aallannginnerminni tunillatsissimanngitsutut uppernarsaateqaraluartut. Angalasut tamarmik taakkulu ilaqutaat tikeraartoqartut "ungaluusamiinnissaat" eqimattanilu amerlasuuniinnaveersaarnissaat kaammatuutigineqarpoq, Nakorsaaneqarfik nun.gl-imi taama nalunaaruteqarpoq.
AAMMA ATUARUK Tamaat isigalugu: Coronavirus pillugu killiffik
- Taamaaliornikkut piffissap sivikitsup ingerlanerani tuniluuttoqangaatsialersinnaanera immaqa pinaveersaartinneqarsinnaavoq.
Nakorsaaneqarfik juullimut katerinnissamut atatillugu ippassaq aamma kaammattuuteqarpoq: Tassa kikkut tamarmik qanillisaminnik killilersimaariniassapput, pingaartumik illoqarfinnit, nunaqarfinnit nunanillu allanit tikeraartoqarunik.
Utoqqaat illuanut pulaartut killilerneqartut
Nuummi utoqqaat illuannut qanoq amerlatigisut piffissami ataatsimi pulaarsinnaanerat killilerneqarpoq: Ullumimit januaarip ulluisa aappaannut utoqqarnut pulaartut amerlanerpaamik pingasut kisimik ataatsikkut isersimasinnaapput. Tassungalu ilaatinngitsitsisoqanngilaq.
Pulaartut ukiuinut tamanut tamanna atuuppoq, aamma najugaqartut ilaqutaannut qaniginerpaasaannut, Kommuneqarfik Sermersooq paasissutissiivoq.
Coronavirusip ilaat Omikron nunatsinnut anngussimanersoq suli ilisimaneqanngilaq. Angalasulli tunillatsissimasut amerlanerat pissutigalugu taamaattoqarneranut takussutissaqarpoq, Nakorsaaneqarfik nun.gl-ikkut paasissutissiivoq.
Coronap sorliuneranik Danmarkimi kisimi misissueqqissaartoqarsinnaavoq, taamaammat akissutersinissaat kinguaattooqqangaatsiarsinnaalluni.