Coronamut misissuiviup matoqqanera Nuummiut uggoraat
Juullip nalaani coronamut misissorneqarsinnaaneq pisarnermit ajornakusoorneruvoq.
Akunnerimmi marluinnaat juullip aappaani taamaallaat ammatinneqarpoq.
Ataasinngornerup ullaap tungaani Inussiviup eqqaani inuppassuit misissorneqarumallutik tunuleriiaarput. Ilaasa qulakkeeruusuppaat ilaqutariit akornanneereernermik kingorna tunillanneqarsimannginnerlutik, ilaalu qulakkeerinnikkusullutik misissortikkiartorput.
Gudrun Berthelsen
Tunuleriiaartunut ilaavoq Gudrun Berthelsen, taakku ilaqutariit Nuup avataaneersumik tikeraartoqarsimagamik nalunartut pillugit misissortikkusupput.
- Ilaquttatsinnik tikittoqarnikuuvoq, pisariaqartissimagaluarparput taassuma misissortinnissaa, juullisiornitsinnilu paaserusukkaluarsimaqaarput ilumut ajunnginnersoq, taamaattumik akunnerilluunniit marluinnaat ammatitsilaarsimasuuppata naapertuunnerusimassagaluarpoq, Gudrun Berthelsen oqarpoq.
Taassuma kissaatigisimagaluarpaa tikeraartortik 24.-iani 25.ianiluunniit misissortissimasinnaagaluarnera, ilaqutariimmi tunillanneqarsimasoralutik ernumannginnerussammata.
- Taamaalilluta ataatsimoornitsinni tamatta tunillanneqarsimanata qulakkeeqqagutsigu toqqissisimanerussagatta, Gudrun Berthelsen oqarpoq.
AAMMA ATUARUK Siumut misissuisarfik pillugu kukkuluttornermut akuliuttoq: Ilungersunartutut isigaarput
Inger Brandt
Tunuleriiaartunut aamma akuuvoq Inger Brandt, taanna juullikkunni kaffisoriartorsimavoq, paasitinneqarsimavorlu kaffisoriartortut ilaat Covid-19-mik tunillanneqarsimasoq.
- Kaffisoriartortitsisup sms-erfigalunga nalunaarfigivaanga kaffisoriartortut ilaat tunillanneqarsimasoq, mattusimasariaqartungalu.
- Misissortissinnaasimanngilanga misissuisarfik matoqqammat, qujanartumilli ajunngilanga, taanna oqarpoq.
Inger Brandt juullip nalaani missorneqarnissaminik pisariaqartitsigaluarluni misissuisarfimmi sulisut juullikkunni freernissaat aamma paasisinnaavaa.
- Aappaatigulli aamma misissortikkusuttoqaraluarpoq, ingammik mattusimatinneqartut akornanni soorlu uanga taamaattunga, oqarpoq.
Karla Petersen
Karla Petersen aamma tunuleriaattuni utaqqivoq. Taassumalu tunuleriiaattut akornanni utaqqisarnini sungiutiinnarsimavaa.
- Marlunnik qitornaqarpunga, meeqqerivimmilu tunillanneqarsimasumik peqarmat akuttunngitsunik misissortittarpugut, kingullermik decembarip 23-iani misissortippugut ajunngilagullu, maannalu aamma misissorteqqilerpugut.
Taanna naalagaasuuguni misissuisarfik matoqqatissanngikkaluarpaa.
- Allatut aaqqiisoqassagaluarami, tassami misissuisarfik matoqqareersimagaangat kingornatigut tunuleriiaattorpassuaqartarpoq, Karla Petersen oqarpoq.
Coronamut missuisarfik nalinginnaasumik decembarip 27-ianiit 30-iata tungaanut ammassaaq. Decembarilli 31-iani jannuaarillu aallaqqaataani matoqqassalluni.
