Naalakkersuisut siulersuisut siulittaasuata tunuarnera ajuusaarutigaat

- Siulersuisuni siulittaasoq Johannus Egholm Hansen Kalaallit Airports Holding A/S-imi, Kalaallit Airports International A/S-imi aamma Kalaallit Airports Domestic A/S-imi siulersuisunit septembarip 30-at, 2020-mit tunuarnissaa pillugu Naalakkersuisut Siulittaasuata Naalakkersuisoqarfia ajoraluartumik ilisimatinneqarpoq.

Naalakkersuisut tusagassiuutinut nalunaarummi allapput.

Jóhannus Egholm Hansen Kalaallit Airportsip siulersuisuini siulittaasutut tunuarpoq.

Tamanna nammineq kissaatigisimallugu, inoqatinut attaveqatigiiffimmi LinkedInimi allappoq.

- Kalaallit Airports Groupimi siulersuisut siulittaasuatut nammineq piumasara malillugu ullumi tunuarpunga.

Taanna Kalaallit Airports A/S-imi Namminersorlutik Oqartussat ingerlatseqatigiiffimmik pilersitsineranit ukioq ataaseq qaangiuttoq - 2017-imi marsimili siulersuisuni siulittaasuulerpoq.

Taassuma tunuarneranut atatillugu siulersuisup tullersortaa, Christian Berg taartaagallassaaq.

- Christian Berg Danmarkimeersuuvoq ukiorpaalunnilu Danmarkimi Sverigemilu mittarfiit pillugit suliniutinik suliniutinilu allani annertuuni misilittagaqarpoq. Ullumikkut Sønderborg Lufthavnimi pisortatut sulivoq, Naalakkersuisut allapput.

Siulersuisut siulittaasuata tunuarneq Nuummi Ilulissanilu mittarfiit sanaartornerannut Qaqortumilu mittarfissap pilersaarusiornerata inaarsarneranut sunniuteqarnavianngitsoq, Naalakkersuisut paasissutissiipput.

- Naalakkersuisut Siulittaasuata Naalakkersuisoqarfiata mittarfiit pillugit suliniutinut piareersarnermut aallartitsinermullu atatillugu Johannus Egholm Hansen qanimut suleqatigilluarsimavaa.

- Taamaattumik Naalakkersuisoqarfiup ingerlariaqqilluarnissaanut ajunnginnerpaamik kissaappaa suleqatigisimaneranullu qujaffigalugu, Naalakkersuisut allapput.

Naalakkersuisut siulittaasuata Naalakkersuisoqarfiani siulersuisunut allattoqarfimmi siulittaasutut atuuffissamut nutaamik pissarsiuleruttorput. Allattoqarfiup siulittaasutut piukkussatik nutaat Naalakkersuisunut innersuussutigissavaat. Kalaallit Airportsimimi siulittaasutut atuuffik kimik inuttalerneqassanersoq Naalakkersuisunit aalajangerneqartussaavoq.