Naalakkersuisut oqartussaaffinnik agguataarigallartut

Naalakkersuisut oqartussaaffinnik nikititerigallarpoq. Naalakkersuisut Siulittaasuata Naalakkersuisoqarfia tusagassiuutinut nalunaarummi taama allappoq.

Agguataarineq Bentiaraq Ottosenip (A) Naalakkersuisutut tunuartariaqarnerata kingorna qaammatip aallartinnerani pivoq.

Avatangiisinut akisussaaffik Naalakkersuisup Peter Borgip (D) akisussaaffigilerallarpaa. Tamatumunnga ilanngullugu Aalisarnermut, Piniarnermut, Nunalerinermut, Imminut Pilersornermut Avatangiisinullu taassuma Naalakkersuisuuffigilerpai.

Meeqqanut Inuusuttunut Ilaqutariinnullu Naalakkersuisup Mads Pedersenip (IA) aamma Nunamut Namminermut akisussaaffigilerallarpaa. 

Taamatuttaaq Isumaginninnermut Suliffeqarnermullu akisussaaffik Naalakkersuisup Aqqaluaq B. Egedep (IA) akisussaaffigilerallarpai. Tamatuma saniatigut Ineqarnermut, Attaveqaasersuutinut Isorliunerusunullu taassuma akisussaaffigai.

Naalakkersuisutut tunuartariaqartoq

Naalakkersuisuusimasup Bentiaraq Ottosen (A) tunuarnissani novembarip 13-ianni aalajangiuppaa. Taanna Isumaginninnermut, Suliffeqarnermut, Nunamullu Namminermut Avatangiisinullu Naalakkersuisuugaluarpoq. 

Taassuma tunuarnera Erik Jensenip (S) Aningaasaqarnermut Akileraartarnermullu ataatsimiititaliami siulittaasutut tamanut ammasumik siunersiuinissamut aggeqqusinerata kingunerisaanik pivoq. 

Suliaq nittartakkakkut suliffissarsiortarfimmut nutaamut januaarip aallaqqaataanni piareertussamut tunngassuteqarpoq. Ataatsimiititaliarli naapertorlugu, suliap ingerlaneranik misissuinermini malittarisassat malinneqarsimanngillat. Nittartakkakkut suliffissarsiortarfittaamik suliaqarnermi Aningaasaqarnermut Akileraartarnermullu ataatsimiititaliamit aningaasat pisariaqartut atornagit pilersinneqarnera pissutaavoq. 

- Taamatut tunuarniuteqarnera isumaqarpunga pingaaruteqartorujussuusoq. Partiit illuatungiliuttut allatut oqalussinnaapput, kisianni piviusoq uaniippoq inuinnakkuluuvugut tamatta, tamattalu aamma killissaqartarpugut. Kisianni akisussaaffik tassaavoq qimarratigisassaanngitsoq, taamaammat tassanngaanniit tunuarniarlunga oqariartuuteqarsimavunga, Bentiaraq Ottosen  kingorna KNR-imit apersorneqarnermini oqarpoq.

Taassumalu Aningaasaqarnermut Akileraartarnermullu ataatsimiititaliami siunersiuisoqarnerani kukkuneq ilisimanagu erseqqissaatigisimallugu oqaatigaa.

- Allaffissornikkut Ilisimanngisannik annertuumik kukkusoqarsimanera ataatsimiititaliaq peqatigalugu ippassaq siunersioqatigiinnermi oqariartuutigivara, Bentiaraq Ottosen oqarpoq.