Tusagassiuutit: USA-p Jens-Frederik Nielsenip ataatsimeeqatiginissaanut aaqqissuussiniaraluartut
USA Kalaallit Nunaata sinniisuinik Danmarki peqataatinnagu, politikkikkut qaffasissumik ataatsimeeqateqarniarsarigaluarput.
Tamanna USA-mit, Kalaallit Nunaanniit Danmarkimiillu tusarfiit oqaloqatiginerisigut Politikenimit tusarneqarpoq.
Sulisaaseq tassaavoq, nunanut allanut, sillimaniarnermut illersornissamullu politikki, Kalaallit Nunaannut pingaarutilimmik oqallittoqassatillugu Danmark Kalaallit Nunaallu peqataatinneqartarnissaat.
Avisilli paasissutissaatai naapertorlugit, USA-p arlaleriarluni Jens-Frederik Nielsen (D), apriilimi Naalakkersuisunut siulittaasunngorneraniit, toqqaannartumik oqaloqatiginiartarsimagaluarpaa.
Præsidentip Illorsuata oqaluttuaq uppernarsarsinnaaneraa Politiken aperivoq. Aviisip ataatsimiittoqassagaluarpat kikkut kalaallit ataatsimeeqatigissaneraat aamma apeqqutigaa.
- Kalaallit Nunaat periusissatut pingaaruteqartuummat Issittup immikkoortuani aarlerinartunut nutaaliaanerusunut USA-mit illersorneqarnissaq kalaallinut pitsaanerussasoq qularinagu, Præsidenti isumaqarpoq. Præsident Trumpip nunaminni nunanilu allani ataavartumik eqqissineqarnissaanut qulakkeerinninnissani pimoorukkaa, Præsidentip Illorsuata Politikenimut allakkatigut akissutaani allaqqavoq.
Kalaallit Nunaannit akueriumaneqanngitsoq
Politikenip paasissutissaatai naapertorlugit, illugiilluni oqaloqatigiinnerit Kalaallit Nunaannit akueriumaneqanngilaq.
Oqaloqatigiinnissamut Amerikamiuniit kina peqataassanersoq aviisi paasissutissaateqanngilaq.
Amerikap præsidentiata Donald Trumpip Kalaallit Nunaannik soqutiginninnera pillugu ukkatarinnittoqarmat ukioq ataaseq qaangiutilerpoq.
Præsidentiuleqqaarnermini Kalaallit Nunaat pisiariumavaa.
Taamani Naalakkersuisut siulittaasuata Mette Frederiksenip (S) isumassarsiaq "isumassaqanngilluinnartutut" taavaa, tamatumalu kingorna Trumpip Danmarkimi tikeraarnissani pilersaarutaasoq piffissaa aalajangernagu kinguartippaa.
Siorna decembarimi oqallittoqarneruleqqippoq. Tassani, Kalaallit Nunaannik piginnittuullunilu aqutsinissaq pingaaruteqarluinnartuusoq Donald Trumpip tusagassiisarfimmini Truth Socialimi allappoq.
Præsidenti tamatuminnga assingusunillu kissaateqarnini arlaleriarluni uteqqiavai.
Politiken ministeriunermit Mette Frederiksenimit (S), Jens-Frederik Nielsenimit aamma nunanut allanut ministerimit Lars Løkke Rasmussenimit (M) oqaaseqaateqaqqusivoq. Arlaannaatali oqaaseqaateqarnissartik kissaatiginngilaat.
/ritzau/
