Naalakkersuisut nutaat: Qujaukitsoq Lund Olsenilu Naalakkersuisunngoqqipput
Nunatta karsia 2014-imi 275 millionit koruunit missaannik amigartooruteqarneranik akisussaatinneqarluni novembarip 28-ani qinersinermi Vittus Qujaukitsoq 87-iinnarnit qinerneqarpoq.
Siumumeersorli Siumut, Demokraatit Atassutikkullu Naalakkersuisooqatigiilerneranni Naalakkersuisunngoqqippoq. Nunanut allanut, Inuussutissarsiornermut Suliffeqarnermut Niuernermullu Naalakkersuisunngorpoq.
Aamma atuaruk Naalakkersuisunngortut aqqi aajuku
Ilimagineqareersutut Siumut-Demokraatit-Atassut-Naalakkersuisooqatigiinnerat Martha Lund Olsenip Naalakkersuisunngoqqinneranik kinguneqarpoq. Isumaginninnermut, Ilaqutariinnermut Naligiissitaanermullu Naalakkersuisunngoqqippoq, Kim Kielsenilu, Naalakkersuisut siulittaasuat, Nunamut namminermut Naalakkersuisuulerpoq.
Inatsisartunut ilaasortanngoqqaarpiartut marluk Naalakkersuisunngorput, tassalu Demokraatineersoq Nivi Olsen Kultureqarnermut, Ilinniartitaanermut Ilageeqarnermullu Naalakkersuisunngortoq, aamma Mala Kuko Høy Atassummeersoq Pinngortitamut, Avatangiisinut Inatsiseqarnermullu Naalakkersuisunngorluni.
Aamma atuaruk Inatsisartut tallimanngorpat inissitsiteriffiusumik ataatsimiissapput
Amerlasuut ilimagereersimavaat Karl-Kristian Kruse (S) Aalisarnermut, Piniarnermut Nunalerinermullu Naalakkersuisunngussasoq, taamannalu eqquuppoq.
Anda Uldum Aningaasaqarnermut Naalakkersuisunngussasoq ilimagineqareersimavoq. Aningaasaqarnermut Aatsitassanullu Naalakkersuisunngorpoq. Allatut oqaatigalugu Demokraatit siulittaasuat annertuumik akisussaaffeqalerpoq.
Atassutip siulittaasua Knud Kristiansen Ineqarnermut, Sanaartornermut Attaveqarnermullu Naalakkersuisunngorpoq. Taamaalilluni Atassuteqatimi Siverth K. Heilmannip Steen Lyngellu naalakkersuisuuffikui tiguai.
Siumullu sinnerlugu folketingemut ilaasortaq Doris Jakobsen Peqqissutsimut Nunanillu avannarlernik suleqateqarnermut Naalakkersuisunngorami nunatsinnut uterpoq. Taassumalu siullertut sinniisussaraa Vittus Qujaukitsoq, taannali aamma Naalakkersuisunngorami sinniisussap tullia, Nick Nielsen, folketingimut ilaasortanngorsinnaanngorpoq.
