Naalakkersuisunngortut aqqi aajuku

Siumup siulittaasua Kim Kielsen Naalakkersuisunut siulittaasunngorpoq. Naalakkersuisoqarfiit agguataarneqarput tupaallannartunillu ilaatigut ilaqarlutik.
Naalakkersuisut 2014 Assi © : KNR
Allattoq Camilla Dam
decembarip 10-at 2014 17:02

Siumup, Demokraatit Atassutillu naalakkersuisooqatigiinnissamik isumaqatigiissutaat sisamanngormat atsioqatigiissutigineqarpoq, siulittaasullu Kim Kielsenip, Anda Uldumip Knud Kristiansenillu naalakkersuisoqarfiit akunnerminni maanna agguataareersimalerpaat.

Naalakkersuisooqatigiinnissamik isumaqatigiissutip atsioqatigiissutigineqarneranut atatillugu tusagassiortunik katersortitsinermi Siumut tallimanik naalakkersuisuutitaqalerpoq Demokraatillu Atassullu tamarmik immikkut marluk.

Kim Kielsen Naalakkersuisunut siulittaasunngorpoq kiisalu Nunamut namminermut naalakkersuisunngorluni.

Demokraatit siulittaasuat, Anda Uldum, Aningaasaqarnermut Aatsitassanullu Aaalakkersuisunngorpoq, Naalakkersuisullu siulittaasuata tullia siullinngorluni.

Atassutip siulittaasua, Knud Kristiansen, Ineqarnermut, Sanaartornermut Attaveqarnermullu Naalakkersuisunngorpoq, Naalakkersuisullu siulittaasuata tulliata aapparilerlugu.

Martha Lund Olsen (S) Isumaginninnermut, Ilaqutariinnermut Naligiissitaanermullu Naalakkersuisunngorpoq.

Nivi Olsen (D) Kultureqarnermut, Ilinniartitaanermut Ilageeqarnermullu Naalakkersuisunngorpoq.

Mala Kuko Høy (A) Pinngortitamut, Avatangiisinut Inatsiseqarnermullu Naalakkersuisunngorpoq.

Doris Jakobsen (S) Peqqissutsimut Nunanillu avannarlernik suleqateqarnermut Naalakkersuisunngorpoq.

Vittus Qujaukitsoq (S) Nunanut allanut, Inuussutissarsiornermut Suliffeqarnermut Niuernermullu Naalakkersuisunngorpoq.

Karl-Kristian Kruse (S) Aalisarnermut, Piniarnermut Nunalerinermullu Naalakkersuisunngorpoq.

 

Sinniisuutitallu makku taamaasillutik Inatsisartunut ilaasortanngussapputt:

Atassut:

Siverth K. Heilmann

Steen Lynge

 

Demokraatit:

Michal Rosing

Tillie Martinussen

 

Siumut:

Jess Svane

Vivian Motzfeldt

Jens-Erik Kirkegaard

Pitsi Høegh