Naalakkersuisut illoqarfinni anginerni singernequteqartitsisalernissaq misissorniaraat
Inuit pineqaatissinneqarsimasunut sivisuumik inissiisarfimmiilernissaminnut utaqqisut maanna 30-t missaannipput. Tamannalu nunatsinni singernequteqartitsisalernissap siunnersuutigineqaqqinneranik kinguneqarpoq.
Taamaammat Naalakkersuisut illoqarfinni anginerni singernequteqartitsisalernissamut periarfissat misissornialerpaat.
- Tamanna eqqartuunneqarsimasunut assigiinngisitsinermik kinguneqassagaluartoq,
pineqaatissinneqarsimasunut inissiisarfimmiilernissamut utaqqisut amerliartuinnarnerat eqqarsaatigalugu
illoqarfinni anginerni singernequteqartitsisalernermik misileraanissaq illersorneqarsinnaanersoq Naalakkersuisut isumaliutigeqqinniarpaat.
AAMMA ATUARUK Singernequteqartitsisalernissaq ilimanaatikittoq: Nunatta isorartunera sakkortuumillu pineqaatissinneqarsimasut aporfiupput
Isumaginninnermut, Ilaqutariinnut Inatsisinillu Atuutsitsinermut Naalakkersuisoq, Martha Abelsen, Inuit Ataqatigiinnit Inatsisartuni ilaasortamut, Peter Olsenimut, akissummini ilaatigut taama allappoq.
Misilerarneqassappat illoqarfinni mikinerni nunaqarfinnilu pineqaatissinneqarsimasut elektroniskiusumik singernequteqarnissamik neqeroorfigineqartassanngillat.
Singernequteqartitsisoqartalissappammi Pinerluttunik Isumaginnittoqarfimmeersut singernequteqartitaasut angerlarsimaffiinut nakkutilliiartukulasinnaanissaat pisariaqarmat.
Tamatuma saniatigut singernequt internettimut qaammataasiamut sakkortusaavimmulluunniit atassuteqanngitsoq mobilikkut attavigittariaqarpoq.
Nunatsinni singernequteqartitsisalernissaq unammilligassarpaaloqarfiusoq
Naalakkersuisut danskit inatsiseqarnermut ministereqarfiatalu tamatumani siunnersuut oqaloqatigiissutigileruttorpaat. Ministereqarfillu nunani allani elektroniskiusumik singernequteqartitsisarnermik misilittagaannik qulaajaasariaqartoq, Martha Abelsen ilisimatitsivoq.
Danmarkimimi elektroniskiusumik singernequteqartitsisarnerup aaqqissuunneqarnera nunatsinni atulissappat unammilligassarpaaloqarfiusussaassaaq.
Tamanna nunatsinni Pinerluttunik Isumaginnittoqarfik pillugu Pisortaqarfiup Kalaallit Nunaanni Eqqartuussiveqarneq pillugu Siunnersuisoqatigiinnut 2018-imi nalunaarusiaani erserpoq.
Danmarkimi angerlarsimaffimmini singernequteqartitaalluni pillagaasup suliffeqarnissaa ilinniartuunissaaluunniit ilaatigut piumasaqaataavoq. Nunatsinnili pineqaatissinneqarsimasut affangajaat aalajangersimasumik angerlarsimaffeqaratillu suliffissaaleqisuupput.
Takuuk:
Ulloq septembarip ulluisa 29-anni inuit 29-t inissiisarfimmiilernissaminnut aggersarneqarnissaminnut utaqqipput. Taakku pinerluttunik isumaginnittoqarfimmit attavigineqarlutik inissiisarfimmiilernissaminnut aggersarneqarnissaminnut utaqqipput.
Tamatuma saniatigut inuit 25-t suli inuiaqatigiinni akuupput, kisianni inissiisarfimmiilernissaminnut aggersarneqarsimapput. Taakkulu pinerluttunik isumaginnittoqarfimmit sapaatinik-akunnerni sisamat sioqqullugit kalerrinneqareersimapput. Tassa imaappoq aggersarneqarsimasoq sapaatit-akunneri sisamat qaangiuppata Pinerluttunik isumaginnittoqarfiup inissiissarfianniilernissaminnut piareersimassapput.
Inuit aggersarneqarnissaminnut utaqqisut: 29
Inuit aggersarneqarsimasut: 25.
Tassa imaappoq ulloq septembarip ulluisa 29-anni inuiaqatigiit akornanniittut suli katillugit 54-iupput.
Kisitsisit ullormiit ullormut allanngorarsinnaapput.
AAMMA ATUARUK Kinguaassiutitigut pinerluuteqarsimasut inissiisarfimmiilernissaminnut inuiaqatigiinni akuusartut
Taakkulu amerlanerpaartaat imigassamik ikiaroornartumillu atornerluinermik ajornartorsiuteqartuupput. Tamannalu pineqaatissineqarsimasup pinerluttulioqqinnginnissamut danskit singernequteqartitsinermut aaqqissuussinerat naapertorlugu pikkorissarnissaanut akornutaassaaq.
Kinguaassiuutitigullu atornerluisimasutut pineqaatissinneqarsimasut angerlarsimaffimminni singernequteqartitaasalersinnaanngitsut, Martha Abelsen ilisimatitsivoq.
Taamaammat nunatsinni elektroniskiusumik singernequteqartitsisalernissaq pineqaatissinneqarsimasunut inissiisarfimmiilernissamut utaqqisut ikinnerulernissaannik kinguneqarnissaa ilimanaatikittoq, Martha Abelsenip Peter Olsenimut akissummini nassuerutigaa.
- Taamaattoqassappat Naalakkersuisut danskit inatsiseqarnermut ministereqarfik tamanna pillugu oqaloqatiginiarpaat. Kisianni Pinerluttunik Isumaginnittoqarfik pillugu Pisortaqarfiup 2018-imi nalunaarusiaani unammilligassat nassuiarneqartut allanngorsimanngitsutut Naalakkersuisut nalilerpaat, taamaammallu singernequteqartitsinermik aaqqissuussineq utaqqisunik ikinnerulertitsinavianngilaq.
Naalakkersuisulli nunatsinni inuiaqatigiinni kiffartuussisussatut pineqaatissiisarneq atuutsinneqarnerulersinnaanersoq misissorusuppaat.
