Kinguaassiutitigut pinerluuteqarsimasut inissiisarfimmiilernissaminnut inuiaqatigiinni akuusartut
![](/sites/default/files/styles/image_934x467/public/retsbygning.jpg?itok=Kssu-K51)
Nunatsinni inuit 64-it pinerluttunik isumaginnittoqarfimmi utaqqisuni allattorsimaffimmiipput. Taakku pinerluuteqarsimasunut inissiisarfimmi inissaqartinneqanngillat. Inunnit 25-nit 15-it meeqqanut 15-it inorlugit ukiulinnut kinguaassiutitigut pinerluuteqarsimapput.
Taakkuli pinerluuteqarsimasunut inissiisarfimmi inissaqannginnera pissutigalugu inuiaqatigiinni akuuginnartarput.
Pinerluttunik Isumaginnittoqarfimmi utaqqisut
Nunatsinni pineqaatissinneqarsimasut illoqarfinni qulingiluani nunaqarfinnilu sisamani pineqaatissinneqarsimasut inissiisarfimmiilernissaminnut utaqqisoqarpoq.
Taakkunannga:
- 25-t kinguaassiutitigut pinerluuteqarsimapput (taakkunannga 15-it meeqqanut 15-it inorlugit ukiulinnut pinerluuteqartuullutik)
- 21-t nakuusernermut atatillugu eqqartuussaasimapput
- 13-it aanngajjarniutinut inatsisit pillugit eqqartuussaasimapput
- 5-it tillinnermut, pisuttorniarluni pinerluuteqarnermut assingusumullu atatillugu eqqartuussaasimapput.
- Nunatsinni pinerluttunik isumaginnittoqarfimmi inissaqartitsinerput killeqarpoq, taamaammat utaqqisunut allattorsimaffeqarpugut. Nunatsinni pinerluttunik isumaginnittoqarfiup pisortaa, Naaja Nathanielsen oqarpoq.
Inissiisarfinni katiterisutullugooq ingerlatsisoqartoq
- Maannakkorpiaq tamaasa inissaqartinngilagut. Pineqaatissinneqarsimasulli inissaqaleriaraangata allanik inissiisarfimmiittussanik ingerlaannartumik aggersaareertarpugut, Naaja Nathanielsen oqarpoq.
- Pineqaatissinneqareersut isersimanissartik naammassigaangassuk, tullii isertarput. Taamaasilluni sulinerput katiterisutullusooq ingerlattuarparput.
Nunarput tamakkerlugu inuit 154-it pinerluuteqarsimasunut inissiisarfimmi inissaqartinneqarput.
Taamaammat pinerluttunik isumaginnittoqarfiup kikkut inissiisarfimmiileqqaassanersut pingaarnersiortarpai.
Nunatsinni eqqartuussiveqarfiit toqqaannartumik inissiisoqarnissaanut imaluunniit inuiaqatigiinni akuulluni eqqartuussutip pinissaanut utaqqiinnartoqarsinnaanersoq sakkortussusilerlugu aalajangertarpaat.
Nunatsinni pinerluttunik isumaginnittoqarfiup ataani pineqaatissinneqarsimasunut inissiisarfimmi inissaqartitsineq
Nunatsinni pinerluuteqarsimasunut inissiisarfinni inissat 154-iupput:
- Tasiilami inissat 15-it
- Ilulissani inissat 29-t
- Aasianni inissat 15-it
- Sisimiuni inissat 9-t
- Qaqortumi inissat 10-t
- Nuummi pineqaatissinneqarsimasunut inissiisarfimmi nutaami inissat 76-it
- Taakkunannga: 40-it matoqqasumi 36-llu ammasumi
- Tassa, utaqqisuniittut utaqqinerminni ulluinnarni inuunertik ingerlattarpaat. Tamanna pinerluttuliornermi eqqugaasunut artornarsinnaasarpoq, utaqqisullumi inuunerminnik ingerlariaqqinnissaminnut utaqqigallartariaqarnerat aamma artornarsinnaasarluni, Naaja Nathanielsen oqarpoq.
Pinerluttunik isumaginnittoqarfiup meeqqanut kinguaassiutitigut pinerluuteqarsimasut pingaarnerpaatut salliuttarpai.
- Pinerluuteqarsimasumik pineqaatissinneqarnissaminut utaqqinermini inuiaqatigiinni akuusumik takulluni sakkortusinnaaneranut tunngavoq. Eqqartuussutigoortitsinermut pisinnaatitaaffiit innarlerneqartutut misigineqarsinnaapput. Meeqqallu pineqartillugit piaartumik aggersaanissaq immikkut pingaaruteqarpoq, Naaja Nathanielsen oqarpoq.
Inissiisarfiit ulikkaavinneqartut
Utaqqisunut allattorsimaffimmiittut sapinngisaq tamaat ikilisinniarlugit inissiisarfiit ulikkaavinneqartartut, Naaja Nathanielsenip nassuiaatigaa.
- Tassa pineqaatissinneqarsimasut ineeqqami ataatsimi marluusarput. Naak tamaalioraluarluta inissaatitta ikinneri pissutigalugu utaqqisoqartuaannassaaq.
Aamma sulisut amigaataapput. Pinerluttunik isumaginnittoqarfik nuna tamakkerlugu 79-init inissiisarfimmi nakkutilliisoqarpoq, taakkunannga 40-t misiliummik nakkutilliisuupput, tassa imaappoq inissiisarfimmi nakkutilliisut suli ilinniartut.
- Amerlanerusunik atorfinitsitsiniarneq ajorpoq, pisortaq oqarpoq.
Pineqaatissinneqartut aggersarnerat ajornakusoortoq
Nunatsinni pinerluuteqarsimasunik isumaginnittoqarfiup pineqaatissinneqarsimasoq aggersaraangagu eqqartuussut nalunaarutigineqartarpoq. Tassa imaappoq pinerluttunik isumaginnittoqarfiup eqqartuunneqarsimasoq inissiisarfimmut sumut aggersarneqarnera pillugu allakkamik nassiussivigisarpaa.
- Eqqartuunneqarsimasunik aggersaanissamut piareeraangatta allakkamik nassiussisarpugut, tassani inissiisarfimmut sorlermut sapaatit-akunneri sisamat qaangiuppata takkutissanersoq allassimasarpoq. Takkutinngikkaangatalu politiinit ujaarineqartarput, Naaja Nathanielsen oqarpoq.
Nunaqarfinnili minnerni tamanna ajornakusoorsinnaavoq.
- Assersuutigalugu Kuummiuni najugaqartunut tamanna ajornakusoorsinnaavoq. Allakkamik tigusisimalluni inissiisarfimmut takkutinngikkaanni taava politiinit ujarneqartarput, Naaja Nathanielsen oqarpoq.
- Taamaaliornissamulli eqqartuussummik nalunaajaatiginnittariaqarnerput pisariaqarpoq. Tamanna nunatsinni najugaqarfiit amerlanerat pissutigalugu ajornakusuulaartorujussuuvoq.
Ukiumi ataatsimi utaqqisartut
Pinerluuteqarsimasunut inissiisarfimmi utaqqisuniittut amerlanerpaartaat inissiisarfimmi inissaqalernissaminnut ukiumi ataatsimi utaqqigajuttarput.
- Ilaat sivikinnerusumik utaqqisarput. Immaqa ilaat pissarsiarinissaat ajornakusoortissimavarput, taamaalillutik sivisunerusumik utaqqisuneeriataarsinnaallutik. Pineqaatissinneqarsimasunut inissiisarfimmiilernissamut agguaqatigiissillugu ukiumi ataatsimi utaqqisoqartarpoq.
- Eqqartuussivimmi eqqartuunneqarsimagaanni eqqartuussiviullu pineqaatissinneqartoq erngertumik inissiisarfimmiilertariaqanngitsoq nalilersimaguniuk taava pineqaatissinneqarsimasoq utaqqisuniilertarpoq ingerlasinnaatitaallunilu. Taava pinerluuteqartumut eqqartuussut pillugu uagut ilisimatinneqartarpugut. Pineqaatissinneqartorlu inissiisarfimmi inissaqaleruni aggersarneqassaaq.