Naalakkersuisut Danmarkimut isumaqatigiissut milliardilikkaanik nalilik nutarteraat
Naalakkersuisut Danmarkimut ukioq kingulleq septembarimi 1,6 milliardit nalingannut killiliussatut isumaqatigiissuteqarput.
Naalakkersuisut isumaqatigiissut nutartigaq isumaqatigiissutigeqqammerpaat. 2026-mit 2029-p tungaanut aningaasaliissutigineqartussat maanna 1,2 milliardiupput.
400 millionit koruunit ukiumut siornatigut immikkoortinneqarnikuunerat KNR-ip allaaserinikuuaa.
Aningaasat attaveqaasersuinermut, nukissiorfinnit pilersorneqarnissamik qulakkeerinninnissamut, inuussutissanut tapinut peqqinnissaqarfimmullu atorneqartussatut immikkoortinneqarnikuupput.
Pingaarnersiukkat isumaqatigiissummi nutaami erseqqinnerupput.
Aqqaluaq B. Egedep (IA), aningaasaqarnermut naalakkersuisup, isumaqatigiissut tusagassiuutinut nalunaarummi naammagisimaarnerarpaa.
- Isumaqatigiissutip immikkoortuata aappaa maanna naammassineqarnera suliniutissallu aalajangersimasut ingerlateqqinneqarsinnaanngornerat nuannaarutigaara.
- Aammattaaq killissaliussatut isumaqatigiissummi suliniutissat piviusunngortinniarnerannut aningaasaliissutit illuatungeriit peqatigiillutik killiffissiuinissaat naammagisimaarnartutut isigaara, pisariaqartinneqavissut isumaqatigiissummi ilanngunneqarsimanerat qulakkeerumallugu.
Oqaatsit assingusut danskit aningaasaqarnermut ministeriannit Peter Hummelgaardimit (Socialdemokratiet) oqaatigineqarput.
- Killiliussatut isumaqatigiissutip ilaani ataatsimoorluta anguniakkagut piviusunngortissavagut. Suliniutinut kalaallinut ulluinnarni malugineqarsinnaasunik aningaasaliivugut, naalakkersuisullu kalaallinik nukittuunik piujuartussanillu ineriartortitsinissaannut tapersiissutaassaaq.
Ilulissanut aningaasaliissutit
Greenland Airports ukiumut nalunaarusiaminni Ilulissat Mittarfiata naammassinissaanut 1,1 milliardit koruuninik pisariaqartitsillutik siorna allappoq.
Killiliussatut isumaqatigiissummi nutartikkami Danmark Greenland Airportsimut ukiumut 125 millionit koruuninik immikkoortitsisassaaq.
- Nuummi mittarfimmik ingerlatsilerneq, Ilulissanilu mittarfimmik inaarsaaneq aningaasaqarnikkut nukittunerusumik mittarfinnut tunngavissaqartariaqarnermik nassataqarput, isumaqatigiissummi nutartikkami allaqqavoq.
Ilulissani imeqarfiusinnaasumik misissueqqaarnissamut ukioq manna 2 millionit koruunit immikkoortinneqarsimapput imermullu illersorneqartussatut immikkoortitamut 1,25 millionit koruunit immikkoortinneqarsimallutik.
Isumaqatigiissutip nutaap ukioq manna 3 millionit koruuninik Ilulissani imermik pilersuineq qulakkiissavaa, aappaagu 37 millionit koruuninik 2028-milu 15 millionit koruuninik.
Nukissiorfiit suliniutillu allat
Nukissiorfimmi teknikkeqarnermut pisortap Filip Sivertsenip aningaasaliissutissanut akuersissutissanulluunniit 400 millionit koruunit amigaatigineqarnerat KNR-imut qaammatip siuliani oqaatigaa.
- Tamanna suleqatitsinnut akisussaassuseqarluartorpassuarnut ernumanartuuvoq nalunagu atortorissaarutinik qangali iluarsaassisariaqarsimagaluarnerput. Atortorissaarutigut ingerlaqqarput, Filip Sivertsen oqarpoq.
Danmark Nukissiorfimmut maanna 92 millionit koruuninik immikkoortitsivoq.
Suliniutit ilaanniippoq nunatsinni innuttaasunut inuussutissanut tapiissut siornatigut allaaserineqarsimasoq. Danmark tassani 45 millionit koruuninik akiliissaaq.
Killiliussatut isumaqatigiissut kalaallit Danmarkimi peqqissartut, Qaqortumi umiarsuarnut talittarfissap Ittoqqortoormiinilu mittarfissap aningaasalerneqarnissaanut aamma atorneqassaaq.
Kalaallit peqqissartut pillugit isumaqatigiissut qaammatip aallartilaarnerani atsiorneqarpoq.
