Danmarkip Kalaallit Nunaanni inuussutissanut tapiissummut akiliinissaa naatsorsuutigineqartoq
Danmarkip Kalaallit Nunaanni inuussutissanut tapiissutinut 45 millionit koruuninik akiliinissaa naatsorsuutigineqarpoq.
Aningaasaqarnermut Naalakkersuisoqarfiup nalunaarusiaani Politikkikkut Aningaasaqarneq pillugu nalunaarummi 2026-meersumi allaqqavoq.
Naalakkersuisut Danmarkilu ukioq kingulleq septembarimi aningaasaqarnikkut tunngaviusumik isumaqatigiissuteqarput.
Isumaqatigiissut imaappoq, Danmarki nunatsinnut 2026-miit 2029-mut 1,6 milliardit koruuninik aningaasaliissasoq.
Aningaasat peqqinnissamut, ineqarnermut iluarsaassinernut, Qaqortumi umiarsuarnut talittarfissamut Ittoqqortoormiinilu mittarfimmut atorneqarnissaat siornatigut eqqartorneqarpoq.
Múte B. Egedep (IA), Aningaasaqarnermut Akileraartarnermullu Naalakkersuisuugallarami KNR-imut oqaatigaa naalakkersuisut nunatta karsiata ilungersunartorsiornera pissutigalugu naalagaaffimmit tapiissutinik amerlanerusunik piniaratik.
Naalakkersuisut akerlianik Danmarkimut aningaasanik piumasaqassapput, taakkulu immikkut ittumik aningaasaliissutissanut siunertanullu atorneqassapput aningaasanut nalinginnaasumik missingersuutinut atornagit.
Naalakkersuisut aningaasat ukiuni tulliuttuni sumut atorneqarnissaat pillugu maanna saqqummiussipput.
Akuersissut amigaataasoq
Aningaasaqarnermut Naalakkersuisoqarfimmit nalunaarummi inuussutissanut tapiissut sukumiisumik saqqummiunneqanngilaq.
Taamaattumik naalakkersuisut Inatsisartunut ukiaanerani ataatsimiinneranni siunnersuummik saqqummiussissanersut paasissutissaqanngilaq.
Naalakkersuisoqarfiup Danmarkimi aningaasaqarnermut ministerip inaarutaasumik suli isumaqatigiissuteqarfigineqannginnera nalunaarummi allappaa.
-Takussutissap immikkoortortaani 2026-mi sillimmatit aningaasartaasa amerlassusaat aamma aningaasat 2027-2029-mi atorneqanngitsut pillugit nassuiaaneq tunngaveqarpoq, danskit aningaasaqarnermut ministeriannik suliniutinut nr. 4-7-imut isumaqatigiissuteqartoqarnissaa naatsorsuutigalugu.
Naalakkersuisut inuussutissanut tapiissut akueraat Danmarkimilu aningaasaqarnermut ministerimut allakkamik nassiussisoqarpoq.
Danmarkimit tapiissut
Innuttaasut naalagaaffimmit immikkut inuiaqatigiilluunniit ataatsimoortut tunineqassanersut pillugit allaqqasoqanngilaq.
Naatsorsueqqissaartarfiup saqqummiinera naapertorlugu nunatsinni inersimasut danskisut innuttaassusillit 40.779-it najugaqarput. Aningaasat tamarmik inunnut ataasiakkaanut tigoriaannanngorlugit tunniunneqassappata 1.103 koruuniussapput.
Danmarkimi inuussutissanut tapiissuteqartarneq maajimi aallartippoq. Tassani aningaasat 1.000 koruunimiit 2.500 koruunimut amerlassuseqarput.
Tapiissuteqarfigineqarniaraanni piumasaqaatinit marlunnit ataaseq malinneqartariaqarpoq:
Meeqqanut inuusuttunullu apriilimi 2026-mi tapiissuteqarfigineqarsimanissaq imaluunniit 2025-mi 475.300 koruunit inorlugit isertitaqarsimanissaq piumasaqaataapput.
Naalagaaffiup inuussutissanut 4,5 milliard koruunit aningaasaliissutigai.
Nunatsinnut inuussutissanut tapiissutissatut missingersuutit 45 million koruuniummata, Danmarkimi inuussutissanut tapiissutiginiarneqartut 100-rarterutigaa.
