Missingersuutit sippugaasut: Ilulissani mittarfittaassaq milliardinik pisariaqartitsivoq
Issittumi mittarfiliornissamut akisuvoq– tamanna Greenland Airportsip Ilulissani mittarfittaaliortitsinermini paasivaa.
Suliffeqarfiup Ilulissani mittarfittaassaq naammassiniarlugu 1,1 milliard koruunit pisariaqartikkai, Sermitsiaq.ag-imi allaaserisaq naapertorlugu, suliffeqarfiup ukiumoortumik nalunaarusiaani allassimavoq.
Nuummi Ilulissanilu mittarfiit katillugit 3 milliard koruuninik aningaasartuutigineqarnissaat naatsorsuutigineqaqqaarpoq.
Sermitsiaq.ag-illi allaaserinninnera naapertorlugu, 4,8 milliard koruuninik taakkua akeqassassut, maanna naatsorsuutigineqarpoq.
Namminersorlutik Oqartussanit taarsigassarserusuttut
Ilulissani mittarfissap sanaartorneranut aningaasalersuutissat sinneri pillugit piginnittut oqaloqatigigitik, Greenland Airportsip ukiumoortumik nalunaarusiaani aqutsisut nassuiaataanni allassimavoq.
Aningaasanik tapiissuteqarfigineqarnissaamiit Namminersorlutik Oqartussat imaluunniit Danmarkip naalagaaffianilluunnit taarsigassarserusunnerullutik, suliffeqarfik Sermitsiaq.AG-mut paasissutissiivoq.
Nunatta karsiata 2024-imi 257 million koruunit sinnerlutik amingartooruteqartoq, taamatullu 2025-mut 357 million koruunit angullugit amingartooruteqarnissaq naatsorsuutigineqartoq, KNR-imi sapaatit akunnerata siuliani allaaseraarput.
Greenland Airportsimut 100 million koruuninik tunniussisoqarsimanera, aningaasartuutit qaffasinnerannut pissutaanerpaanut ilaavoq.
Sanaartukkat inuiaqatigiinnut aningaasartuutaaneranniit naggataatigut isertitsissutaanerussasut nalunaarusiaqarpat, nunatta karsia aningaasanik amerlasuunik attartortitsisinnaavoq.
Paragraffi taanna ukioq manna aningaasanut inatsisissap oqaluuserineqarnerani oqallissutaaqaaq. Ilinniartunut najugaqarfissaq 188 million koruuninik akeqartussaq, missingersuutinit peerneqarluni taarsigassarsisitsisarnerup ataaniittussanngortinneqarnera tamatumani peqqutaavoq.
Ilinniartut najungaqarfiinik sanaartorneq naatsorsuinernik nalorninartunik tunngaveqarpoq, inuiaqatigiinnut ukiut 46-it ingerlaneranni aatsaat iluanaarutaalissasoq naatsorsuutigineqarmat.
