Nunap karsia 257 millioninik amigartoortoq
Naalakkersuisut nunap karsiata 2024-mi aningaasaatai qanoq atorneqarsimanersut saqqummiuteqqammerpaat.
Nunap karsia siorna 257 millionit koruuninik amigartoorpoq.
Angusaq taanna missingersuutaasumut uniuinerungaatsiarpoq. Aningaasanummi 2024-mut inatsit naapertorlugu nunap karsia 2024-mi 284 millionit koruuninik sinneqartoortussatut missingersuusiorneqaraluarpoq. Tamannali tassa pinngilaq.
Nunap karsiata aningaasatigut angusarlunnera Namminersorlutik Oqartussat ingerlatseqatigiiffiutaannut marlunnut aningaasartornermik peqquteqartoq, KNR-ip tusarfiata tutsuiginartup, aningaasaqarnermut naalakkersuisoqarfimmeersup, nassuiaatigaa.
Milliardip affaa NunaGreen-imut Kalaallit Airportsimullu
Nunammi karsia NunaGreen-imut, 400 millionit koruuninik siorna aningaasaliivoq. Kalaallit Airportsimut aamma 100 millioninik aningaasanik tunniusaqarpoq. Taakkua amigartoornermut peqqutaanerpaapput.
Ingerlatsinermili angusaq pitsaagaluarpoq. Aningaasartuutit isertitanit ikinnerugamik ingerlatsinermi 150 millionit koruuninik sinneqartoortoqarluarpoq. Ingerlatseqatigiiffinnulliuna milliardit affaanik aningaasaliinermi angusaq nakkarsaataasoq.
2025 aamma angusarluffiussangatinneqartoq
Nuna tamakkerlugu qinikkat aningaasatigut niaqorluutissaat taakkuinnaanngillat.
Aningaasat 2025-imi atorneqartussat missingersuutaasa malittareqqinneqarnerat Naalakkersuisut aamma saqqummiuteqqammerpaat.
Ukiumut 2025-mut siornatut amigartooqqinnissaq maanna aamma aarlerisaarutigineqalereerpoq. Malittareqqiinermi inerniliuussaq naapertorlugu nunap karsia 2025-imi 347 millionit koruuninik maanna amigartuussangatinneqalerpoq.
Amigartoorutissarlu ukioq mannamut aningaasanut inatsisiliornermi ilimagisamit angineruvoq.
Tassami aningaasanut inatsit siorna ukiakkut akuerineqarmat 121 millionit koruuninik 2025-mi amigartoornissaq missingersuutaaqqaaraluarpoq.
Amigartoornerunissamut peqqutaanerpaat ilaat tassaapput Namminersorlutik Oqartussat ingerlatseqatigiiffiutaasa nunap karsianut tunniussassaat 107 millionit koruuninik ikinnerusussanngornerat aamma Peqqissutsimut Naalakkersuisoqarfiup missingersuutaaqqaartunit 65 millionit koruuninik aningaasartornerulernera kiisalu utoqqalinersiutinut 59 millionit koruuninik atuineruneq.
Missingersuutit ajorseriarnissaat Naalakkersuisut tusaatissatut tigugaat, aningaasaqarnermut naalakkersuisoq, Múte Bourup Egede nalunaarpoq.
KNR-ip aningaasaqarnermut naalakkersuisoq 2024-mi angusaq missingersuutinillu malittareqqiineq pillugu apersorusullugu attaveqarfigigaluarpaa. Tamannali maannamut suli iluatsinngilaq.
