Naalakkersuisut Danmarkimilu Kalaallit Illui isumaqatigiissuteqartut
Kalaallit Illuisa ilinniartitaanermi suliassanik isumaginnittarnerat suleqatigiinnissamik isumaqatigiissummi pineqarpoq.
- Nuannaarutigivara isumaqatigiissut manna maanna atsioratsigu. Taamaalilluta isumaqatigiissut aqqutigalugu qulakkeersinnaanngorparput kalaallit Danmarkimi ilinniagaqartut Danmarkimi nunanilu allani ilinniagaqarnerminnut atatillugu Kalaallit illuini sulisunit pikkorissunit ilitsersorneqartarnerisa ingerlatiinnarneqarnissaa, naalakkersuisoq Ane Lone Bagger oqarpoq, nangillunilu:
- Tamatumalu saniatigut ilinniagaqarnersiutit pillugit maleruaqqusanik aqutsinermi Kalaallit illui Naalakkersuisunut sinniisutut suli atuutissapput. Qularnaarparput ilinniartitaanermut tunngatillugu ilitsersuisarnerup ullutsinnut naapertuuttuunissaa aamma pisunut attuumassuteqarnermik tunngaveqarnissaa, Ane Lone Bagger oqarpoq.
AAMMA ATUARUK Kalaallit Illuutaat oqalutsinik ajornartorsiuteqartut
Suliassat erseqqissarneqartut
Isumaqatigiissut aqqutigalugu Kalaallit illuisa ullumikkut pisariaqartitaannut siunissamilu pisariaqartilerumaagaannut tunngatillugit suliassaat itisiliiffigineqarlutillu erseqqissaassutigineqarput. Pingaartumik nunatsinni ilinniagaqarnersiutit pillugit maleruaqqusanik aamma ilinniartunik ilitsersuisarnermik Kalaallit illuisa aqutsisarnerat pineqartoq, naalakkersuisut taama ilaatigut allaaserisaqarput.
Naalakkersuisut Kalaallillu illuisa suleqatigiinnissamik isumaqatigiissutaat nutaaq Københavnimi Kalaallit Nunaata Sinniisoqarfiani Aalborgimi, Odensemi Københavnimilu Kalaallit illuisa siulersuisuni siulittaasuannit kiisalu Aarhusimi siulittaasup tullianit atsiorneqarpoq.
Nutaamik isumaqatigiissuteqarnikkut isumaqatigiissut 2006-imeersoq atorunnaarsinneqarpoq.
AAMMA ATUARUK Nikingasoqarnera Kalaallit Illuutaasa iliuuseqarfigileruttorpaat