NALUNAARUSIAQ Nikingasoqarnera Kalaallit Illuutaasa iliuuseqarfigileruttorpaat
Nalunaarusiami nutaami taama inerniliussisoqarpoq, naqissuserlugulu kalaallit Danmarkimiittut danskinut naleqqiullutik ulluinnarni naliginnaasumik pingaaruteqartutigut ajornerujussuarmik inissisimasut.
Kalaallilli Danmarkimut nuuttut ikiorniarlugit annertuumik suliniuteqartoqareerpoq.
Nalunaarusiami annertuumi saqqummeqqammersumi "Kalaallit Danmarkimiittut"-mi kalaallinut ilaqutariinnut meerartalinnut suliniutit annertusisariaqartut kaammattuutigineqarpoq. Taamatulli suliniuteqartoqareersoq Kalaallit Illuutaanni Københavnimiittumi pisortaq Leise Johnsen isumaqarpoq.
- Kalaallit Illuutaanniit tamaniit taama suliniuteqareerpugut. Maannalu kommunit assigiinngitsut Danmarkimiittut kalaallit inuuniarnikkut ajornartorsiortut pillugit suleqateqarnitsigut aamma ukkatavut illuanut saatsinnikkuuvagut.
Aamma atuaruk Danmarkip Nunattalu peqatigiillutik kalaallit Danmarkimiittut ikiussavaat
- Nalunaarusiami nutaami kisitsisit 2011-meersut tunngavigineqarput. Kalaallinut inissaqaratik, suliffissaqaratik ilinniarfissaqaratilluunniit tikittartunut ikiuiniarnertik 2013-imiillu Danmarkimi illoqarfiit annerit tallimat annertusarniarsimavaat.
Kalaallinut Danmarkimi inuuniarnikkut ajornartorsiuteqartunut taama suliniuteqarnisi tunngatinneqarput.- Tamannalu isumaqassanerpoq siunissami qanittumi taama suliniuteqarnissi kinguneri takusinnaaneqalissasut? Aperaarput.
- Københavnip Kommuniata suliniaqatigiiffiillu naalakkersuisutiguunngitsut suleqatigineri pitsanngoreernikuupput. Imaassinnaavorli suleriaatsit arlallit misissoqqitassaassasut.
Aarhusimittaaq Kalaallit Illuutaanni pisortaq Jørn Holbech isumaqarpoq, kalaallit inuuniarnikkut ajornartorsiuteqartut annertuumik ukkatarineqareersut.
Aamma atuaruk Kalaallit Danmarkimiittut inooqataaniarnermikkut ajornartorsioqaat
Uparuarpaa Danmark Kalaallit Nunaallu ilinniartitaaneq pillugu annertunerusumik suleqatigiittariaqartut. Nalunaarusiaq naapertorlugu ilinniarneq tassatuaavoq piitsuussutsimiit inuuniarnikkullu ajornartorsiutiniit aniguisitsisinnaasoq.
- Danskit ilinniartitaanermut immikkoortortaqarfiisa isumaginnittoqarfiillu akornanni suleqatigiittoqarnerusariaqarpoq, kalaallit maanga tikittartut nakkaateriataarsinnaanerat annertunerummat, Aarhusimeersoq Jørn Holbech oqarpoq.
Illuutini pisortat marluk uparuarpaattaaq kalaallit danskini inuiaqatigiinni akuullualertariaqarnerat siunertaralugu suliniuterpaaluit atuutsilersinniarneqartut.
