NALUNAARUSIAQ Kalaallit Danmarkimiittut inooqataaniarnermikkut ajornartorsioqaat

Nalunaarusiami pingasunngornermi saqqummertussami annilaarnartut ilaat taama nipaqarput, kalaallit Danmarkimut nunassissimasut inuuneri pillugit nalunaarusiarineqarsimasumi.

Nalunaarusiami erseqqissarneqarpoq, nooreernerup kingorna naak ukiut arlaqartut qangiutereeraluartut kalaallit Danmarkiittut danskinut naleqqiullutik inuuniarnikkut assorsuaq ajornartorsiuteqartatut.

Aamma atuaruk Kalaallit Danmarkimiittut peqataalersinniarneqarnerinut suliniutit pitsanngorsarneqarlik

"Kalaallit Danmarkimiittut" pillugit nalunaarusiap inernerata takutitai assorsuaq nikalluallannarput.

Danmarkimi atugarissaarneq pillugu Naalagaaffiup Ilisimatusarfianiit suliaqartoq Siddhartha Baviskar taama oqarpoq.

- Pingaarnertut inerniliussap ersersippaa kalaallit Danmarkimiittut danskinut naleqqullutik assorsuaq sanngiinnerusut.

Misissuinermi kalaallit 2011-mi Danmarkimi inuusut piffinni assigiinngitsuni aqqaneq marlunni danskinut naleqqiunneqarput.

Ilutigitillugu kalaallit 2007-imi Danmarkimut nuussimasut 221-it ukiuni tallimani malittarineqarput.

Misissuinerit taakku marluk inernerisa ersersippaat , kalaallit Danmarkimiittut danskinut naleqqiullutik assorsuaq ajornartorsiuteqarnerusut.

- 25-iniit 60-inut ukiullit akornanni amerlanerit - tassa 47 procentit - ilinniakkanik piginnaaneqalissutaasunik peqanngillat - danskit sinnerini 30 procentiusut. 25-iniit 60-inut ukiullit qiviaraanni kalaallit akornanni ikinnerit tassa 35 procentiinnaat suliffeqartuupput, danskit sinnerisa akornanni 80 procentiusut.

Nalunaarusiami atuarneqarsinnaasut ilagaat, meeqqat angerlarsimaffiup avataanut inissinneqartartut danskinut naleqqiullugit kalaallit meerartaat arfinileriaammik amerlanerusut.

Aamma atuaruk ALLAATIGISAQ Kalaallit Illuutaat: Folketingimut qinersinermut atatillugu pingaartitavut

Danskinut naleqqiullutik kalaallit quleriaammik amerlanerit imigassamut katsorsatsipput. Danskinut naleqqiullutik kalaallit angerlarsimaffeqanngitsut 50-eriaammik amerlarnerupput.

Assorsuaq quarsaarnarpoq, Siddahartha Baviskar isumaqarpoq.

- Assigiinngissutsit assorsuaq annertupput, tamannalu eqqasunnissamut peqqutissaalluarpoq.

Taamaattumik misissuisup innersuussutigaa kalaallinut Danmarkimiittunut isumaginninnikkut immikkut suliniuteqartoqassasoq - aammali Kalaallit Nunaanni.

- Ajornartorsiutit ilaat Danmarkimut nuunnermi pilertanngillat. Kalaallit Nunaanniit aallannginnermi ajornartorsiutit pigineqareertarput.

Misissuineq 2011-meersuugaluartoq suliarinnittoq isumaqarpoq taamanikkut pisutsit ullutsinnut assigusorujussuusut.

- Soorluuna tamatuma tungaatigut allanngortoqarsimanngitsoq. Soorlu aamma Kalaallit Nunaanni allanngortoqarujussuarsimanngitsoq. Assersuutigalugu Kalaallit Nunaanni aamma iliuuseqarnerup tungaatigut annerusumik pisoqarsimanngilaq, soorlu kalaallit Danmarkimukannginneranni ajornartorsiutaat pillugit iliuuseqarnikkut allanngortinneqarsinnaasut pillugit, misissuinermik suliaqartoq oqarpoq.

Kalaallit Danmarkimi inuuniarnerat pillugu aatsaavissuaq taama sukumiitigisumik misissuisoqarpoq.