NALUNAARUSIAQ Danmarkip Nunattalu peqatigiillutik kalaallit Danmarkimiittut ikiussavaat
Kalaallit Danmarkimiittut suliffeqanngitsut ilinniagaqanngitsullu danskinut naleqqiullugit amerlanerujussuupput.
Pisortanit ikiorsiissutinik pisartagallit tallimariaammik amerlanerupput. Aamma kalaallit meerartaat angerlarsimaffiup avataanut inissinneqartartut danskit meerartaannut naleqqiullugit arfinileriaammik amerlanerupput.
Aamma atuaruk NALUNAARUSIAQ Kalaallit Danmarkimiittut inooqataaniarnermikkut ajornartorsioqaat
Tamakku Danmarkimi atugarissaarnermik nuna tamakkerlugu ilisimatusarfiup SFI-p nalunaarusiaani imartuumi, "Kalaallit Danmarkimiittut", ullumi pingasunngornermi saqqummiunneqartumi inerniliussat ilagiinnarpaat.
Kisitsisilli folketingimut ilaasortap Siumumeersup Aleqa Hammondip tupaallaatiginngilai:
- Inerniliussat tupaallaatigivallaanngilakka, ukiunimi arlalinni taamatut inissisimasoqarnera ilimagigatsigu, KNR-imut taama oqarpoq.
Kalaallit Danmarkimut tikinnerini ikiorneqartarlik
Aleqa Hammondilli aamma pissutsit allaganngorlugit uppernarsaatissaqalernerat nuannaarutigaa isumaqarlunilu Nunarput Danmarkilu peqatigiillutik suliassaqartut, ilaatigut kalaallit Danmarkimut tikinnerini ikiorserneqartarnerisa nukittorsarneqarneratigut.
Nalunaarusiaq naapertorlugu kalaalerpassuit Danmarkimi ukiuni tallimani najugaqareernerini pissutsit atugarisaat pitsanngoriarneq-ajorput. Amerlasuut ilaatigut suliffissaaleqinertik pissutigalugu ajornartorsiutitik qaangerneq-ajorpaat, aamma pissutsit ilungersunarnerusut, soorlu suliffeqannginneq imaluunniit ilinniagaqannginneq pissutigalugit imigassamik pinerlunnermillu ajornartorsiuteqalersarput taamaalillutillu aamma ajornartorsiutitik qaangerneq-ajorlugit.
Tamakkuli pinngitsoortinneqarsinnaapput, Aleqa Hammond taama isumaqarpoq.
- Kalaallit Danmarkimi inuiaqatigiinni peqataalernissaasa siuarsarneqarnissaanut siusissukkut suliniuteqarneq annertunerusariaqarpoq ersarinnerusariaqarlunilu, taamaaliornitsigut ajornerusumik killittoqareersoq aatsaat iliuuseqarnissaq angusassanngikkaluarparput.
Periusissaq annertusarneqassaaq
Hammondip suliniutit Kalaallit Danmarkimi Inooqataaniarnikkut Ajornartorsiutillit pillugit Periusissatut ittut, Danmarkimi kommunit annersaanni tallimani 2013-imi aallartisarneqartut sunniuteqarnerat aammali annertusartariaqarnerat tikkuarpaa.
Tamannalu Inuit Ataqatigiinneersumit Aaja Chemnitz Larsenimit ilalerneqarpoq, taannami isumaqarpoq periusissaq 2016-ip tungaanut ingerlanneqartoq annertusarlugu Danmarkimilu kommuninut amerlanerusunut atuuttussanngorlugu ingerlatiinnarneqartariaqartoq.
Tamatumunngalu peqatigitillugu kalaallit Danmarkimiittut sulilersinniarneqarnissaat danskit tungaannit annertunerusumik suliniuteqarfigineqartariaqarsoraa.
- Ullumikkummi inuit ilatsiinnartunngortinneqartarput. Pisortanit ikiorsiissutinik tunineqartarput sulilersinniarnissaannullu naammattumik iliuuseqartoqartarani. Tamatumunngalu tunngatillugu isumaqarpunga danskit suliassartik taanna naammassisimanngikkaat.
Nunatsinni paasititsiniaaneq pitsaanerusoq
Politikerillu taakku marluk Danmarkimut nuunnermi sunik naatsorsuuteqartariaqarnermik Nunatsinni annertunerujussuarmik paasititsiniaasoqartariaqarnera isumaqatigiissutigaat.
- Paasititsiniutinik amerlanngitsunik suliaqartoqareerpoq, taakkuli pissarsiarineqarsinnaanerat Folketingimut ilaasortanngorama aatsaat paasivara. Taamaammat isumaqarluinnarpunga Nunatta tungaanit naammaginartumik paasititsiniaasoqarsimanngitsoq. Aammami kommunit suliassarivaat, isumaqarpungali aamma nuna tamakkerlugu suliassaasoq, Aaja Chemnitz Larsen taama oqarpoq.
Taamaammat folketingimut ilaasortat nunatsinneersut danskit isumaginninnermut nunamilu namminermi pissutsinut ministeriat Karen Ellemann (V) suliaq pillugu attaviginiarpaat kiisalu aamma kalaallit Danmarkimiittut suliniuteqarfigineqarnerisa nukittorsarneqarnissaa aningaasanut inatsisissaq pillugu isumaqatigiinniarnissanut piumasaqaatiginiarlugu.