Assammik arsarneq: Kalaallit ajorsarmata USA VM-imut annguppoq
Assammik arsarnermi nunarsuarmi pissartanngorniunnissamut angutit nunanut allanut unammisartut maanna anngutinngillat. VM-imut anngunniulluni finalemi kalaallit USA unammivaat USA-mi illoqarfimmi Bettendorfimi naalagaaffimmi Iowamiittumi. USA ajugaavoq 32-18-imik taamalu 2027-mi VM-ertoqarnissaanut Tysklandimi pisussamut anngulluni.
Unammersuarnermi kalaallit aallartilluarput Canada målinik 20-nik ajugaaffigalugu. Tamanna tupaallaatigineqarpoq Parisimi januaarimi unammisoqarnerani kalaallit Canadamiullu naligeeqalutik unammimmata. Finalemut anngukkiartornermi kalaallit Mexico aamma målinik qulinik ajugaaffigaat.
Ilimagineqareerpoq USA-p arfininngornermi unammillerniarnera ajornakusoorumaartoq. USA unammisartunik sakkortuunik ukiuni kingullerni pilersitsivoq 2028-mi aasaanerani OL-qarnerani aaqqissuisuunissaminnut piareersaatitut.
Siunissamut takorluukkat
USA 13-10-mik muminnermi siuaqqareerluni siuariartulertorpoq.
- Nalunngilarput ajugaassagutta tamanna tupaallaataangaatsiartussaasoq, nuna tamakkerlugu sungiusaasoq Johannes Groth KNR-imit oqaloqatigineqarluni nalilersuivoq.
- Taamaattoq piareersarluarpugut upperivissorlugu tupaallatsitsisinnaalluta aammalu aallartilluarluta. Amerikamiulli aamma takutippaat nukittullutik unammisarnernilu misilittagartuujullutik, Johannes Groth oqarpoq.
Taassuma nassuiarpaa taama oqaaseqarnermigut eqqarsaatiminiitikkini Nunatsinni sapaatip akunneranik sivisusseqartumik pissartanngorniuttarneq naammanngitsoq, nunani tamalaani anguniagaqassagaanni. Taamaattumik arsaq unammisartunut tunniuppaa, VM-imut anngunniunnermi tullerni inissisimajuaannassanngikkunik iliuuseqarsinnaammata.
- Arsartut ataasiakkaatut periarfissaqarput assammik arsartartutut siunissap eqqarsaatiginissaannut namminerlu ujartueqataaffigalugu timikkut nukkassarnissamut allanillu avatangiiseqarluni assammik arsarnermi inerisarsinnaaneq eqqarsaatigalugu, Johannes Groth oqarpoq.
Kalaallit arlallit assammik arsarneq akissarsiutigalugu Nunatta avataani siornatigut unammisartuupput Minik Dahl Høegh kisiartaavoq maanna akissarsiutigalugu Nunatta avataani unammisartuusoq.
Ilanngullugu taasariaqarpoq angutit Savalimmiuneersut nunanut allanut unammisartut Tysklandimi VM-qarnissaanut anngummata. Puljenut makitsineq juunip qulinganni pisussaaq.
