Naalakkersuisup suiaassutsikkut immikkoortitsineq nammineq nalaannikuugaa: Oqallisigineqassaaq
“Arnaavutit, tamakku naluatit”
“Allaffinniiginnarsinnaagaluarputit takujuminarlutillu”
“Angerlarsimaffinnii meeqqatit pingaarnerutittariaqaraluarpatit iganerlu isumagalugu”
“Aappaqartaraluarpit?”.
Oqaatsit qulaaneq taaneqartut peqqissutsimut naligiissitaanermullu naalakkersuisup, Anna Wangenheimip (D) tusarnikuuai. Tamanna tusagassiuutinut nalunaarummi allappaa.
AAMMA ATUARUK Nikanarsagaallutik tiingaffigineqartut: Nipangersimaannarasi kisimiinngilasi
Suliffeqarfinni assigiinngitsuni inuiaqatigiinnilu suiaassutsikkut immikkoortitsineq Danmarkimi maanna oqallisigineqaleruttorpoq. Nunatsinni politikerit politikkikkut suliaqarnermi kinguaassiutitigut innimiilliorfigineqartarneq pillugu marsimi saqqummiimmata sammisaq oqallisigineqangaatsialerpoq.
Anna Wangenheimip oqarnera naapertorlugu nunatsinni oqallinnerup aallarteqqinnissaanut pissutissaqarluarpoq.
- Naligiissitaanermut suliassaqarfimmi nunami angutinut arnanullu atugassanut toqqissisimanartunut naligiissunullu qanilliartorsinnaassagutta, ulluinnarni suiaassutsikkut immikkoortitsisarnerup akuerisaaginnarnera ajugaaffiginiarlugu sammisaq paqumigisaasoq oqallisigineqartassaaq, naalakkersuisoq tusagassiuutinut nalunaarummi allappoq.
Misissuinermik aallartitsiniartoq
Tamatuma saniatigut nunatsinni suiaassutsutsimik immikkoortitsineq politikkikkut naammattumik ukkatarineqarsimannginnerarpaa. Naallu angutit suiaassutsikkut immikkoortinneqarneq aamma nalaattaraluaraat, politikkip ukiorpassuarni angutinit aqunneqarsimanerani sammisaq naammattumik ukkatarineqarsimanngitsoq, Anna Wangenheim allappoq.
Taamaammat Peqqissutsimut naligiissitaanermullu naalakkersuisoq ajornartorsiutip annertussusaanik siammasinnerusumik qulaajaanissamut periarfissanik misissuerusuppoq - misissuinissarli qanoq qaqugulu aallartinneqassanersoq itinerusumik oqaaseqarfiginngilaa.
