Naalakkersuisup KNAPK-p siulittaasua avoqqaaraa: Aalisarnermut ataatsimiititaliarsumit atuagaqarnissat naatsorsuutigaara

Aalisarnermut piniarnermullu naalakkersuisup KNAPK-mi siulittaasunngortoq pilluaqquaa.

Nikkulaat Jeremiassen aalisartut piniartullu kattufianni sapaatip akunnerata naanerani siulittaasunngorpoq.

- Siullermik siulittaasunnngortoq pilluaqquara naalakkersuisut sinnerlugit, aamma siulittaasuusimasoq qujaffigalugu isummersuilluarneranut, Aalisarnermut naalakkersuisoq, Aqqaluaq B. Egede (IA) oqarpoq.

Nikkulaat Jermiassen Siumumit Inatsisartunut ilaasortaavoq – taassumalu kattuffimmi siulittaasutut qinerneqarnera kattuffimmi siulittaasup taarserneranik kinguneqarpoq. Taassuma Henrik Sandgreen ukiuni arfineq-pingasuni siulittaasuusimasoq taarserpaa: Nikkulaat Jeremiassen siulittaasumik qinersinermi taaguussisunit 25-usunit 16-init taaguunneqarpoq, Henrik Sandgreenilu arfiniliinnarnit taaguunneqarluni.

Piujuartitsisumik aalisarneq innersuussutiginngikkaa

Siulittaasortaarneq aalisarnermi pisoqarfioreeqisoq pivoq, aalisarnermummi ataatsimiititaliarsuup isumaliutisiissutini ukiut marluk sinnerlugit suliarereerlugu Naalakkersuisunut tunniuteqqaammerpaa.

Isumaliutissiissut aalisarnermut inatsisissamut nutaamut arlalinnik innersuussuteqarpoq. Taanna ilaatigut sinerissap qanittuani saarullinniat qaleralinniallu ikilisinneratigut aalisarnermi nutarsaaqataallunilu attanneqarsinnaasumik aalisalernissamik pilersitseqataassaaq.

AAMMA ATUARUK KNAPK-mi siulittaasoq nutaaq aalisarnermi nutaamik sammiveqartitsilersoq

Henrik Sandgreenip ataatsimiititaliarsuup innersuussutai ilusilersueqataaffigisani ammaffigai.

Nikkulaat Jeremiassenilli ammaffiginagit.

Siulittaasunngortup uumassusilerisut innersuussutaat tamarmik akerleralugit umiatsiaararsortunut pisassiissuteqartoqalernissaa – tassa Aalisarnermut ataatsimiititaliarsuup innersuussutaasa akerlerluinnai sulissutiginiarlugu KNR-imut oqaatiginikuuaa.

- Tatineqariartorneq tamatta misigisimavarput nunatsinni pisassiissutaasut eqqarsaatigalugit allaat imatut oqartoqartalerluni aalisartut amerlavallaarput, Nikkulaat Jerimiassen oqarpoq.

Quppernerit 31-t atuarsimanngikkai

Aalisarnermut naalakkersuisulli taama nalunaaruteqarneq eqqissisimasumik tigullugu oqaatigaa. Aqqaluaq B. Egedemmi KNAPK-mi siulittaasunngortup qanoq isumaqarnera toqqaannartumik ersarinngissoraa.

Nikkulaat Jeremiassenimmi Aalisarnermut ataatsimiititaliarsuup isumaliutissiissutaa 316-inik qupperneqartoq tamaat atuarsimanngikkaa maluginiarpaa. Tamanna siulittaasunngortup Qanoruumut ataasinngormat nassuerutigaa. Taamaammat siulittaasup isumaliutissiissut atuareeruniuk kattuffik isummerumaartoq, Aqqaluaq B. Egedep naatsorsuutigaa.

AAMMA ATUARUK Nikkulaat Jeremiassen nunatsinni aalisartunut piniartunullu siulittaasunngortoq

- Assersuutigisinnaavarput nunatta aningaasaqarneranut tunngasut, aalisartoqassutsimut tunngasut, aamma naalakkersuisut uagut siulitta, ataatsimiititaliarsuaq pilersikkamikku, suliakkiussaat imaakkami, aalisagaqassuseq aalisartoqassuserlu imminnut naapertuuttunngorsarneqassapput, Aalisarnermut naalakkersuisoq oqarpoq nangillunilu:

- KNAPK-ip aalisartut atugarissaarnissaat, aningaasarsiorluarnissaat, aammalu pitsaasumik inuussutissarsiutit piujuarnissaat uatsitulli aamma soqutigisarivaat, taamaakkami siunissami attanneqarsinnaasumik politikkimik pilersitsiniarnermi KNAPK aamma aalajangiisupiluusussaavoq, Aqqaluaq B Egede oqarpoq.

Aningaasaqarnermut siunnersuisoqatigiit Aalisarnermut ataatsimiititaliarsuaq isumaqatigigaat

Aalisarnermut ataatsimiititaliarsuaq sinerissap qanittuani aalisagakinneruleriartornera aalisakkallu milliartornerat pissutigalugit aalisartut aningaasarsiniarlutik ilungersornerat pissutigalugu aalisarnermik annikilliisoqarnissaanik innersuussuteqartuni kisimiinngilaq.

Aningaasaqarnermut Siunnersuisoqatigiit nalunaarusiaminni kingullermi septembarimi saqqummersinneqartumi aamma taamaaliorput.

Tamatuma saniatigut nunatsinni aningaaseriviit annersaat Grønlands Banken Qeqertarsuup Tunuani sinerissap qanittuani aalisarnermi ajalusoortoqarnissaanik ingerlaavartumik mianersoqqussuteqartarpoq.

Tamanna toqqaannartumik pissutigalugu aningaaserivik umiatsiaararsorluni aalisarnermut 2019-imili aningaasanik nutaanik atortitsisimanngilaq.

Nikkulaat Jeremiassen Inatsisartuni Kim Kielsenimut sinniisuuffigisaminit maanna tunuarpoq.