KNAPK-mi siulittaasoq nutaaq aalisarnermi nutaamik sammiveqartitsilersoq
KNAPK-mi taasisinnaatitaasut amerlanerussuteqartut Nikkulaat Jeremiassen aalisartut piniartullu kattuffianni sapaatip akunnerata naanerani ataatsimeersuartoqarnerani siulittaasussatut toqqarpaat.
Kattuffimmi nutaamik siulittaasoqalernerata saniatigut Aalisarnermut ataatsimiititaliarsuup aalisarnermik piujuartitsinissamik anguniagaqarluni innersuussutaanut isornartorsiuinerusumik aamma sammiveqartoqalerpoq.
Ataatsimiiititaliarsuummi aalisapiluttoqarnera sinerissallu qanittuani qaleralinniarneq saarullinniarnerlu pissutigalugit uumassuseqarnikkut aningaasaqarnikkullu ajutoortoqaratarsinnaasoq mianersoqqussutigaa.
AAMMA ATUARUK Aningaasaqarnermut Siunnersuisoqatigiit nalunaarusiami nutaami: Amerlavallaat aalisarnermi sulipput
Tamannalu siulittaasunngortup tunngaviusumik ilimaginngilaa.
- Massakkut killiffipput eqqarsaatigalugu ajornartorsiut nuisoq ataatsimiitsitaliarsuup suliarisimasaa ilaatigut erseqqarluttumik oqariartuutigineqarnerani taanna aallaavigalugu uanga aamma nalunngilara nutsertoqartoq kattuffimmut allamut, Nikkulat Jermiassen sapaatip akunnerata naanerani siulittaasumut qinigassanngortinnermini oqarpoq.
Taassuma KNAPK-mi ilaasortat arlallit kattuffimmut unammillertaasumut SQAPK-mut Aalisarnermut ataatsimiititaliarsuup innersuussutaanut akerliusumut pisassiissuteqartoqarnerunissaanik noqqaassuteqartumut nuussimanerat innersuussutigaa.
Siulittaasuusimasup ingerlavigisimasaata illuanut ingerlaveqarniartoq
Taamaalilluni siulittaasuusimasoq, Henrik Sandgreen ataatsimiititaliarsuup ukiuni qulikkaani aalisarnermik qulakkeeriniarluni innersuussutigisai aallaavittut ammafigisai aamma isornartorsiorpai.
- Aalisartut piniartullu atugaasa pittanngorsartuaannarnissaat taanna amigaatigilersimavarput.
Nikkulaat Jeremiassenip uumassusilerisut innersuussutaat tamarmik akerleralugit umiatsiaararsortunut pisassiissuteqartoqalernissaa sulissutiginiarpaa.
- Tatineqariartorneq tamatta misigisimavarput nunatsinni pisassiissutaasut eqqarsaatigalugit allaat imatut oqartoqartalerluni aalisartut amerlavallaarput.
AAMMA ATUARUK Aalisarnermut ataatsimiititaliarsuaq: Politikerit pisassiissuteqartarunnaassapput
Aalisarnermut ataatsimiititaliarsuup ersarissumik innersuussuteqarnera tassa aalisarneq ajalusoorsinnaammat inuussutissarsiutinilu allani sulisussaaleqisoqarnera pissutigalugu aalisarnermi suliaqartukinnerunissaanik oqarnera innersuussutigaa.
- Ila arraa, sineriassuarput kangerluppassualik ilaatigut aalisagassaqassusii ilisimaneqanngittoq, sooruna tassunga killittugut?, KNAPK-mi siulittaasunngoqqammersoq oqarpoq.
Aalisarnerup ajutoornissaa assigiinngitsunit mianersoqqussutigineqartoq
Aalisarnermut ataatsimiititaliarsuaq sinerissap qanittuani aalisagakinneruleriartornera aalisakkallu milliartornerat pissutigalugit aalisartut aningaasarsiniarlutik ilungersornerat pissutigalugu aalisarnermik annikilliisoqarnissaanik innersuussuteqartuni kisimiinngilaq.
Aningaasaqarnermut Siunnersuisoqatigiit nalunaarusiaminni kingullermi septembarimi saqqummersinneqartumi aamma taamaaliorput.
AAMMA ATUARUK Aalisarnermut ataatsimiititaliarsuup aalisartukinnerunissaa innersuussutigaa: Meeqqatsinnut ernuttatsinnullu naammassapput
Tamatuma saniatigut nunatsinni aningaaseriviit annersaat Grønlands Banken Qeqertarsuup Tunuani sinerissap qanittuani aalisarnermi ajalusoortoqarnissaanik ingerlaavartumik mianersoqqussuteqartarpoq.
Tamanna toqqaannartumik pissutigalugu aningaaserivik umiatsiaararsorluni aalisarnermut 2019-imili aningaasanik nutaanik atortitsisimanngilaq.
