Aningaasaqarnermut Siunnersuisoqatigiit nalunaarusiami nutaami: Amerlavallaat aalisarnermi sulipput
Aalisartoqarpallaaqaaq.
Ilaqutariit amelavallaat aalisarnermik pisariaqartitsilersimapput. Tamannalu aalisagaqassuseq aningaasarsiornerluunniit eqarsaatigigaanni nappanneqarsinnaanngilaq.
Taamaammat iluarsaaqqinnissaq pisariaqartoq, Aningaasaqarnermut Siunnersuisoqatigiit nalunaarusiaminni ullumi saqqummiussaminni allapput.
- Aningaasaqarnikkut imminut napatinniarluni Kalaallit Nunaanni inuussutissarsiutit pingaarnersaata inuiaqatigiit aningaasaqarneranni pissarsivigineqarnissaanut annertuunik ajornartorsiuteqartoqarpoq, pissarsiarineqartartut pissarsiarineqarsinnaasunit ikinnerummata.
Nalunaarusiami taama allassimasoqarpoq.
Tassalu nunarput aalisarnermit pissarsiarisinnaasaraluaminit naammatumik pissasiaqarneq ajorpoq. Tamanna aalisarnermi ullumikkut sulisoqarpallaaneranik peqquteqarpoq.
AAMMA ATUARUK Aalisarnermut ataatsimiititaliarsuaq: Aalisagakinnerulinngikkuni pisassakinnerulissapput
Tamanna ingammik sinerissamut qanittumi qaleralinniarnermi saaqurullinniarnermilu atuuppoq.
- Sinerissap qanittuani qaleralinniarsinnaanermut saarullinniarsinnaanermullu akuersissutit tunniunneqartut atorneqartullu ukiuni arfineq marlunni – arfineq pingasuni kingullerni amerleriajussuarput ilaqutariippassuillu aningaasaqarneranni aalisarnerit taakku ineriartornerat isumalluutinngornikuuvoq, siunnersuisqatigiit allapput.
Raajarniarneq ukiut tallimassaanni siuariarfiulluni ingerlalluarpoq. Raajarniarneq nappanneqarsinnaalluni MSC-mit ilisarnaasiogaavoq.
Aamma aalisakkat akii coronap nalaani apparsimasinnarlutik qaffakkiartulerniarpasipput.
Najoqqutaq: Aningaasarnermut Siunnersuisoqatigiit
Sinerissamut qanittumi qaleralinniarnissamut akuersissutaatillit 2020-mi 2.177-iupput taavalu 1.756-it sinerissamut qanittumi saarullinniarsinnaallutik.
AAMMA ATUARUK Ataatsimiititaliarsuaq qaleralinniarneq pillugu: Killiffik attanneqarsinnaanngilaq
Tassalu aalisartut amerlavallaat, sivisunerusumik inuussutissarsiutigisinnaanngisaminnik suliaqartuupput. Illuani inuussutissarsiorfiit allat sulisussaaleqeqaat.
- Isumalluutit taakku immikkoortuni allani sunniuteqarnerusumik atorneqarsinnaapput, taamaalilluni inuussutissarsiornerup assigiinngiiaarnerusumik aaqqissuussaanissaanik taamaalillunilu imminut napatissinnaanerusumik patajaatsumillu aningaasaqarnissap qulakkeerneqarnissaat tapersiisinnaalluni, nalunaarusiami allaqqavoq.
Tassalumi suliffissarpassuit, soorlu aatsitassarsiornermi imaluunniit isumaginninnermi sulisussanik amigaateqarput, uffa aalisarnermi sulisut amerlavallaaqisut.
Taamaammat aalisarneq iluarsaateqqinneqartariaqartoq, siunnersuisqoatigiit isumaqarput.
Politikerillumi aamma aalisarneq pillugu nutaamik inatsisiliorniarlutik ukiuni arlalinni oqaluttarput, maannamut suli piviusunngunngitsumik.
Aalisarneq assigiinngitsorpassuarnik isumaqarfigineqarpoq, arlaannullu sammiveqartumik aalajangerneq misigissutsinik aalassatitsissaaq.
AAMMA ATUARUK Asii Chemnitz om afskaffelse af afgift: Vi venter på Fiskerikommissionen
Politikerit taamaammat inassusiortussanik Aalisarneq pillugu ataatsimiititaliarsualiorput, inassutaallu aalisarneq pillugu inatsisiliornermi atorneqassapput.
Isumaliutissiissutaallu utaqqiloorneqartoq saqqummilerpoq.
Politikerillumi ataatsimiititaliarsuup inassutai malittariaqaraat, aningaasaqarnermut Siunnersuisioqatigiit naliliipput.
- Imminut napatissinnaanerusumik aalisarneq inuiaqatigiillu aningaasaqarneranni
annertunerusunik pissarsiaqarnissap qulakkeerneqarnissaat anguniarlugu Aalisarneq pillugu Ataatsimiititaliarsuup inassuteqaataasa ingerlateqqinnissaat pingaaruteqarluinnarpoq, taakkua allapput.
Aalisarneq pillugu ataatsimiititaliarsuup isumaliutissiissutini aqagu sisamanngornermi saqqummiutissavaa.
ataatsimiititaliarsuarlu taanna aalisartoqarpallaarneralugu siusinnerusukkut oqareerpoq.