Asii qaleralinnut akitsuut pillugu: Ataatsimiititaliarsuaq utaqqivarput

Maanna Naalakkersuisuusuni partii anneq Inuit Ataqatigiit qaleralinnut akitsuutip peerneqarnissaanik Inatsisartunut ukioq qineqqusaaruteqarput.

Tamannali piviusunngusanersoq maanna oqaatigerusunngilaat.

Aalisarneq pillugu ataatsimiititaliarsuup isummernissaa utaqqeqqaarusukkaat, aningaasaqarnermut naalakkersuisoq, Asii Chemnitz Narup allappoq.

- Taamaammat Inuit Ataqatigiinnit oqarpugut, siunissaq unammillernartunik pisussaaffiliimmat, aalisakkanut akitsuut, tassa qaleralinnut akitsuut sinerissap qanittuani atorunnaarsissavarput. Aalisartut kaasarfimminni piareersimasuuteqarnissaat taamanikkussamut qulakkeerusukkatsigu,

Aalisarnermut maanna naalakkersuisoq, Aqqaluaq B. Egede Ilulissani ukioq qineqqusaarnermini taama oqarpoq.

AAMMA ATUARUK KNAPK om hellefiskeafgift: Stemmefiskeri

Taassuma partiia, Inuit Ataqatigiit, Inatsisartunut ukioq qineqqusaarummini akitsuut taanna, umiatsiaararsorluni aalisartunit akilerneqartartoq, atorunnaarsissallugu aamma allappoq.

- Sinerissap qanittuani qaleralinnut akitsuut atorunnaarsissavarput, Inuit Ataqatigiit qineqqusaarumminni allapput.

Aalisarneq pillugu ataatsimiititaliarsuaq aalajangiissasoq

Qinersinerli maanna qaangiussimalerpoq. Partiillu suliniutiginiarlugit neriorsuutitik piviusunngortinniartussanngorpaat.

Kisianni sinerissap qanittuani qaleralinnut akitsuutip atorunnaarsinnissaanik aningaasanut aappaagumut inatsisissatut siunnersuummi suliniummik suli ersittoqanngilaq.

Aningaasanummi aappaagumut inatsisissatut Naalakkersuisut siunnersuutaanni sinerissap qanittuani qaleralinnut akitsuut peerneqalersaanngilaq.

Akitsuut nunatta karsianut ukiuni missingersuusiorfiusuni tullerni sisamani, ukiumut 16 millionit koruuninik isertitaqaataasuaannartussatut siunnersuutaavoq.

KNAPK-llu siulittaasua, Henrik Sandgreen, pakatsisimaarpoq.

- Qinersisartunik pinnanniutaannaasoq isumaqarpunga.

KNR-p aningaasaqarnermut naalakkersuisoq, Asii Chemnitz Narup, KNAPK-p isornartorsiuinera pillugu apersorusussimagaluarpaa, taannali piffissaqannginnerarpoq. Allakkatigulli akivoq, akitsuutip atorunnaarsinnissaa maanna piffissaanngitsoq.

- Aalisakkanut pisuussutinit iluanaarutinut akileraarut allanngorneqarnissaanut tunngatillugu, tamatumunnga sinerissap qanitaani aalisarnermut pisuussutinit iluanaarutinut akileraarut ilanngullugu, Naalakkersuisut Ataatsimiititaliarsuup isummersuutaa utaqqivaa, Asii Chemnitz Narup allappoq.

Qaleralinnianut akitsuut nunatta karsianut 16 millionit koruuninik ukiumut iluanaarutaasarpoq.