KNAPK qaleralinnut akitsuut pillugu: Qinersisartunik aalisarneruvoq
Aningaasanut aappaagumut inatsisissatut siunnersuummi sinerissap qanittuani qaleralinnut akitsuut Naalakkersuisunit peerneqalersaanngilaq.
Qaleralinnianut akitsuut nunatta karsiata 16 millionit koruuninik ukiumut isertitaqaatiginissaa missingersuutaavoq.
Akitsuut nunatta karsianut ukiuni missingersuusiorfiusuni tullerni sisamani, ukiumut 16 millionit koruuninik isertitaqaataasuaannartussatut siunnersuutaavoq.
Naalakkersuisuni partiit annerpaap, Inuit Ataqatigiit, akitsuutip peerneqarnissaa Inatsisartunut upernaaq qineqqusaarnermi qineqqusaarutigaa.
- Sinerissap qanittuani qaleralinnut akitsuut atorunnaarsissavarput, Inuit Ataqatigiit qineqqusaarumminni allapput.
Qinersisartunik aalisarnertut taagaa
Taama qineqqusaaruteqarneq qinerneqarluarnermut sunniuteqartoq KNAPK-p siulittaasua isumaqarpoq. Atorunnaarsinneqalersaanngimmalli qineqqusaarutaannaasutut nalilerpaat.
- Qinersisartunik pinnanniutaannaasoq isumaqarpunga. Inuit aningaasanik kaasarfimmioqarnerulaarsinnaanerata aallerfigineqarnera uanga isumaga malillugu politikkimi ataqqinassutsimik tutsuiginassutsimillu innarleerujussuarneruvoq, Henrik Sandgreen KNR-imut oqarpoq.
KNAPK-p aningaasaqarnermut naalakkersuisoqarfimmeersut ataatsimeeqatigilerunikkit akitsuutip atorunnaarsinneqarnissaa oqaluusererusuppaa.
AAMMA ATUARUK Naalakkersuisoq: Qaleralittassatut innersuussutit uniorlugit pisassiinavianngilagut
Aningaasaqarnermut naalakkersuisoq, Asii Chemnitz Narup, aningaasanut aappaagumut inatsisissatut siunnersuut saqqummiukkamiuk allannguutissatut siunnersuuteqarniartut aningaasat suminngaanneernissaanik siunnersuuteqarnissaat aamma kissaatigalugu oqarpoq.
KNAPK-llu siulittaasuata aningaasat suminngaanniit aaneqarnissaat oqaatigiumannngilai.
- Oqareernittuut isumaqatigiinniarnerit suliluunniit naapissimatinnagit tusagassiuutitigut ingerlannavianngilakka, Henrik Sandgreen oqarpoq.
Taanna naapertorlugu KNAPK-p aningaasaqarnermut naalakkersuisoqarfik piffissami qanittumi ataatsimeeqatigissavaa.
